اعجاز مہر
بی بی سی اردو ڈاٹ کام، اسلام آباد |  |
|  دونوں ممالک کی باہمی رضامندی سے جاری کردہ شیڈول کے مطابق مذاکرات اٹھائیس جولائی سے پچیس اگست تک جاری رہیں گے |
پاکستان اور بھارت نے پہلے سے طے کردہ آٹھ نکات کے متعلق مذاکرات کے شیڈول کا اعلان کردیا ہے۔ دفتر خارجہ کے ترجمان کے مطابق دو نکات کے بارے میں پہلے ہی دونوں ممالک میں بات چیت شروع تھی لیکن باقی چھ نکات کے بارے میں بھی مذاکرات کے شیڈول پر اتفاق ہوگیا ہے۔ ترجمان کے مطابق دونوں ممالک کے درمیان وولر بیراج اور تل بل نیویگیشن پروجیکٹ کے بارے میں مذاکرات اٹھائیس اور انتیس جولائی کو، دہشت گردی اور ڈرگ ٹریفکنگ کے متعلق دس اور گیارہ اگست کو جبکہ اقتصادی اور تجارتی شراکت پر بات چیت گیارہ اور بارہ اگست کو اسلام آباد میں ہوگی۔ ان کا کہنا تھا کہ دوستانہ تبادلوں کے فروغ کے بارے میں بات چیت تین اور چار اگست کو، سیاچین پر پانچ اور چھ اگست کو جبکہ سر کریک کے متعلق چھ اور سات اگست کو دونوں ممالک کے نمائندے نئی دہلی میں مذاکرات کریں گے۔ یاد رہے کہ آٹھ میں سے دو نکات امن اور سلامتی بشمول اعتماد کی بحالی کے اقدامات اور جموں اور کشمیر کے متعلق دونوں ممالک کے نمائندے نئی دہلی میں ستائیس اور اٹھائیس جون کو بات چیت کر چکے ہیں۔ پاکستان اور بھارت کے وزرائے خارجہ پچیس اگست کو اس وقت تک کیے جانے والے مذاکرات کی پیش رفت کا جائزہ لینے کے لیے ملاقات کریں گے۔ وزراء خارجہ کی ملاقات سے ایک دن قبل دونوں ممالک کے سیکریٹری خارجہ بھی ملیں گے۔ بھارت اور پاکستان کے درمیاں رواں سال جنوری میں جنوبی ایشیا میں علاقائی تعاون کی تنظیم سارک کے اجلاس کے موقع پر اسلام آباد میں صدر جنرل پرویز مشرف اور بھارت کے اس وقت کے وزیراعظم اٹل بہاری واجپائی کے درمیان آٹھ نکات پر جامع مذاکرات کرنے پر رضامندی ظاہر کی گئی تھی۔ بھارت میں نئے انتخابات کے بعد قائم ہونے والی کانگریس حکومت نے بھی طے شدہ نکات پر مذاکرات جاری رکھنے کا اعلان کیا تھا۔ | 
یہ صفحہ دوست کو ای میل کیجیئے
پرِنٹ کریں
