ہارون رشید بی بی سی اردو ڈاٹ کام، پشاور

	شمالی وزیرستان میں فوج اور مقامی طالبان کے درمیان لڑائی جاری ہے

یہ واقعہ پیر کی صبح شمالی وزیرستان کے صدر مقام میران شاہ سے تین کلومیٹر دور تھبی گاؤں کے قریب پیش آیا۔ نامعلوم افراد نے ایک فوجی چوکی کو پانی مہیا کرنے والے ٹینکر پر گولی چلا دی جس سے اس کا ڈرائیور اور اس کا ساتھی موقع پر ہلاک ہوگئے۔

حکام کے مطابق یہ نجی ٹینکر تھا۔ ہلاک ہونے والے دونوں افراد بھی مقامی قبائلی بتائے جاتے ہیں۔

ادھر اتوار کی رات میران شاہ کے قریب ایک فوجی چوکی پر پھر نامعلوم افراد نے راکٹوں سے حملہ کیا۔ سکیورٹی فورسز نے بھی جوابی کارروائی کی تاہم اس سے کسی جانی نقصان کی اطلاع نہیں ملی ہے۔

میران شاہ سے مشرق میں میر علی شہر میں پیر کو ایک مرتبہ پھر قبائلی عمائدین کا ایک جرگہ ہوا جس میں فوج کو علاقے سے نکال کر سرحد تک محدود رکھنے کا مطالبہ دہرایا گیا۔

اس جرگے میں مقامی شدت پسندوں کا ایک پیغام بھی پڑھ کر سنایا گیا جس میں فوج کے انخلاء اور اسلحہ لے کر چلنے پر پابندی کے خاتمے تک حکومت سے مذاکرات نہ کرنے کا اعلان کیا گیا تھا۔

جرگے میں شریک قبائلی مولانا عبدالرحمان نے بی بی سی کو بتایا کہ شدت پسندوں نے اپنے پیغام میں واضح کیا ہے کہ وہ پاکستان، فوج یا عوام کے دشمن نہیں اور وہ بھی امن کے خواہاں ہیں۔