عزیزاللہ خان بی بی سی اردو ڈاٹ کام، کوئٹہ

	اکبر بگٹی کے مطابق بگٹیوں کا حکومت سے ملنا حکومتی پروپیگنڈہ مہم کا حصہ ہے

ڈیرہ بگٹی سے ٹیلیفون پر نواب اکبر بگٹی نے بتایا کہ یہ حکومت کا پروپیگنڈہ مہم کا حصہ ہے جبکہ یہ لوگ جن کا حکومت دعویٰ کر رہی ہے کبھی ان کے ساتھی رہے ہی نہیں ہیں۔

ان کا کہنا تھا کہ ڈیرہ بگٹی میں اب بھی بمباری ہو رہی ہے اور مختلف مقامات پر جھڑپوں کا سلسلہ جاری ہے جس میں سکیورٹی فورسز کا جانی نقصان ہوا ہے۔

اس سے پہلے صوبائی حکومت کے ترجمان رازق بگٹی نے کہا تھا کہ نواب اکبر بگٹی کے دو کمانڈر اپنے چالیس ساتھیوں سمیت حکومت کے ساتھ مل گئے ہیں اور انہوں نے ہتھیار ڈال دیے ہیں۔ انہوں نے کہاکہ لوگ تنگ ہوکر حکومت کی طرف آرہے ہیں۔

ان سے جب پوچھا گیا کہ کیا یہ جرائم پیشہ لوگ ہیں تو رازق بگٹی کا کہنا تھا کہ یہ عجیب بات ہے کہ جب ان کے ساتھی ہوتے ہیں تو مجاہد اور جب کسی دوسرے کے پاس چلے جاتے ہیں تو جرائم پیشہ لوگ ہو جاتے ہیں۔ انہوں نے کہا کہ یہ ہماری سیاست کا حصہ رہا ہے۔