ہارون رشید بی بی سی اردو ڈاٹ کام، پشاور

	پنجاب میں پتنگ بازی ہلاکتوں کا باعث ثابت ہوتی رہی ہے

اس قانون کے تحت صوبہ بھر میں پتنگ بازی، پتنگوں اور دھات یا نائلون کی تار یا مانجھے کی فروخت پر مکمل پابندی ہوگی اور پولیس کو خلاف ورزی کرنے والوں کے خلاف کارروائی کرنے کا اختیار ہو گا۔

قانون کے تحت خلاف ورزی کرنے والے کو تین ماہ قید یا چالیس ہزار روپے تک جرمانے کی سزا دی جاسکے گی۔

تاہم ضلعی ناظم حکومت کی پیشگی منظوری سے مخصوص مقامات پر دو ہفتوں تک پتنگ بازی کی اجازت دے سکے گا۔ پتنگ بازی سے منسلک تاجروں کے لیے بھی اب ضلعی انتظامیہ کے پاس اندراج کرانا لازمی قرار دیا گیا ہے۔

پنجاب میں موسم بہار کے موقعہ پر بسنت کا تہوار بڑے پیمانے پر منایا جاتا ہے۔ تاہم صوبہ سرحد میں بڑے پیمانے پر پتنگ بازی کی کوئی روایت نہیں۔

صوبائی حکومت کی جانب سے اس قانون کی منظوری پر عوامی حلقوں میں حیرت کا اظہار کیا جا رہا ہے۔ پتنگ بازی سے منسلک تاجروں کی جانب سے اس قانون سازی پر کوئی فوری ردعمل سامنے نہیں آیا ہے تاہم ان کا کہنا ہے کہ وہ اس بارے میں جلد اخباری کانفرنس کا اہتمام کریں گے۔

صوبائی وزیر بلدیات اور دیہی ترقی سردار ادریس نے اس قانون کا بل منگل کو سرحد اسمبلی کے اجلاس میں پیش کیا۔ بل بغیر کسی قابل ذکر بحث کے متفقہ طور پر منظور کر لیا گیا۔ اس قانون سازی کی وجہ انہوں نے پتنگ اڑانے کے عمل سے انسانی جانوں اور سرکاری اور نجی املاک کو خطرہ قرار دیا۔