ہارون رشید بی بی سی اردو ڈاٹ کام، پشاور

	تنظیم کے کارکن میلے کو زبردستی بند کروانا چاہتے تھے

ڈیرہ پولیس کے ڈپٹی انسپکٹر جنرل پولیس ذوالفقار احمد چیمہ نے بی بی سی کو بتایا کہ کالعدم تنظیم سپاہ صحابہ پاکستان کے سینکڑوں کارکنوں نے اتوار دوپہر ڈیرہ اسماعیل خان شہر سے مغرب میں تیس کلومیٹر دور چودوان کے علاقے میں میلہ شا عالم پر حملہ کیا اور اسے زبردستی بند کرانے کی کوشش کی۔

پولیس کے مطابق مقامی لوگوں اور میلے کے منتظمین نے اس کی مزاحمت کی جس کے دوران گولیوں کا تبادلہ بھی ہوا۔ موقعہ پر موجود پولیس اور ایف سی نے بھی حملہ آوروں کے خلاف کارروائی کی۔

مقامی رہائشی موسی خان نے بتایا کہ پانچ مقامی قوموں کا یہ میلہ ہر سال موسم بہار میں شاہ عالم گاوں میں کالو قلندر کی درگاہ پر منعقد کیا جاتا ہے۔ مسلح افراد نے میلے کے خیمے اکھاڑنا شروع کر دیے۔

پولیس کے مطابق چالیس حملہ آوروں کو گرفتار کیا گیا ہے جبکہ گولیوں کے تبادلے میں ایک شخص زخمی بھی ہوا ہے۔ مقامی لوگ ہلاکتوں کا بھی دعویٰ کر رہے ہیں تاہم پولیس نے اس کی تصدیق نہیں کی ہے۔

صدیوں پرانا یہ مقامی میلہ ہر سال باقاعدگی سے منعقد کیا جا رہا ہے۔ تاہم اس سال مذہبی جماعت کے لوگوں نے اسے نہ منعقد کرنے کے لیئے کہا تھا۔ ان کا کہنا تھا کہ اس میلے کے دوران غیراسلامی سرگرمیاں منعقد کی جاتی ہیں۔