انوار الحسن بی بی سی اردو ڈاٹ کام بالاکوٹ

	’شہر کو رہائش کے لیے غیر موزوں قرار دیا جانا دوسرا بڑا زلزلہ ہے‘

آٹھ اکتوبر کو آنے والے زلزلے میں بالا کوٹ بری طرح متاثر ہوا تھا۔

ناروے، ترکی اور چین کے زلزلہ ماہرین کی سیسمک رپورٹوں کی روشنی میں پاکستان کے نیم سرکاری ادارے نیسپاک کی جانب سے مرتب کی جانے والی رپورٹ میں کہا گیا ہے کہ علاقے سے تین تھرسٹ لائن گزر رہی ہیں۔ دو تھرسٹ لائنز میں صرف ایک کلو میٹر کا فاصلہ ہے۔

صوبہ سرحد میں زلزلہ متاثرین کی بحالی کے ادارے کے سربراہ جمشید الحسن نے بدھ کو بالاکوٹ میں ایک پریس کانفرنس سے خطاب کرتے ہوئے کہا کہ لوگ اس علاقے میں سرمایہ کاری نہ کریں اور حکومت بالا کوٹ کو محفوظ مقام پر آباد کرنے کی جگہ کا جلد اعلان کرے گا۔

پریس کانفرنس کے موقع پر ضلع ناظم سردار یوسف اور ضلع افسر بھی موجود تھے۔

حکومت کی تمام تر وضاحتوں کے باوجود بالاکوٹ کے باسیوں ذہن میں اب کئی نئے سوالات بھی گردش کررہے ہیں۔ بالاکوٹ کے ایک مکین منوراحمد خان کا کہنا ہے کہ صرف شہر کی منتقلی ہی مسئلہ نہیں ہے بلکہ روزگار تعلیم اور صحت جیسے مسائل بھی اس سے جڑے ہوئے ہیں اور اب ریڈ زون میں شامل ہونا بالاکوٹ کے لئے دوسرا زلزلہ ہے۔

بالاکوٹ جہاں آٹھ اکتوبر کے زلزلے نے تقریباً دس ہزار جانیں لی تھیں۔ شہر کے ریڈ زون میں شامل ہوجانے کی وجہ سے یہاں کے باسی نہ صرف چار دیواری کے لیے پریشان ہیں بلکہ ایک نئی جگہ پر نئے سرے سے آبادکاری سے متعلق غیر یقینی مستقبل کی تکلیف سے بھی گزر رہے ہیں۔