ہلاک کیے جانے والوں کے لیے مقامی لوگ دعا کرتے ہوئے

پاکستانیوں کی لاشیں دفنا دی گئیں

پاکستانی حکام کے مطابق ان سولہ افراد کا تعلق نورزئی قبیلہ سے تھا جو کہ سرحد کے دونوں طرف رہتےہیں۔ کابل میں پاکستانی سفارت خانے کے ترجمان محمد نعیم نے کہا ہے کہ ان سولہ افراد کو گرفتار کرکے ایک جعلی مقابلے میں ہلاک کر دیا گیا۔

اسلام آباد میں بی بی سی کے نامہ نگار مبشر زیدی کے مطابق پاکستان نے جمعرات کو اسلام آباد میں تعینات افغانستان کے سفیر کو دفتر خارجہ طلب کر کے ان سے بدھ کو افغان افواج کے ہاتھوں ہلاک ہونے والے سولہ پاکستانی شہریوں کی ہلاکت پر سخت احتجاج کیا ہے۔

دفتر خارجہ کی ترجمان تسنیم اسلم نے بی بی سی سے بات کرتے ہوئے کہا کہ افغان سفیر سے ان ہلاکتوں پر جواب مانگا گیا ہے کہ کس طرح افغان فوج نے ان بے گناہ پاکستانی شہریوں کو طالبان جنگجو قرار دے کر ہلاک کر دیا۔

ان کے مطابق کابل میں تعینات پاکستانی سفیر افغان وزارت خارجہ کے ساتھ مسلسل رابطے میں ہیں اور افغان حکام سے اس واقعے کی فوری تحقیقات کا مطالبہ کر رہے ہیں۔

	ہلاک کیے جانے والوں کی نماز جنازہ

اس سے پہلے افغان فوجی ذرائع نے کہا تھا کہ افغان افواج نے پاکستان کی سرحد کے قریب سپن بولدک میں مشتبہ طالبان شدت پسندوں پر حملہ کیا تھا جس کے نتیجہ میں سولہ مشتبہ طالبان شدت پسند ہلاک ہو گئے تھے۔

تاہم افغانستان کے صوبہ قندہار کے گورنر اسد اللہ خالد کے نائب نعمت اللہ خان نورزئی نے خبر رساں ادارے اے پی کو بتایا کہ ان سولہ افراد کو قبائلی تنازعہ کی وجہ سے ہلاک کیا گیا۔

افغانستان میں حکام کا کہنا ہے کہ ان ہلاکتوں کی تفتیش کی جا رہی ہے۔

افغان حکومت کا کہنا ہےکہ پاکستان طالبان جنگجؤں کو اپنے علاقے میں پناہ لینے سے روکنے میں ناکام رہا ہے، جبکہ پاکستانی حکام افغان خفیہ اداروں کی کارکردگی پر تنقید کرتے رہے ہیں۔