ہارون رشید، بی بی سی اردو ڈاٹ کام، پشاور

	مسلم لیگ (ق) پر کئی لوگ پیسے کے ذریعے ووٹر خریدنے کا الزام لگاتے ہیں

صوبہ سرحد میں حکمراں متحدہ مجلس عمل، عوامی نیشنل پارٹی اور پیپلز پارٹی پارلیمینٹرین کے درمیان سینیٹ کے انتخابات کے لیئے اتحاد کے باوجود توقعات سے کم نشستیں ملنے پر ایک بحث چل نکلی تھی کہ منحرف اراکین اسمبلی نے پیسے یا دباؤ کے تحت آکر ووٹ کسی اور کو دیا۔

ان انتخابات کے لئے مسلم لیگ (ق) نے سرحد اسمبلی میں اراکین کی کم تعداد ہونے کے باوجود زیادہ امیدوار کھڑے کئے۔ اس جماعت پر اس وجہ سے کئی لوگ پیسے کے ذریعے ووٹر خریدنے کا الزام لگاتے ہیں۔

تاہم مسلم لیگ (ق) کے صوبائی صدر امیر مقام اس کی تردید کرتے ہیں۔ ’نہیں ایسی تو کوئی بات نہیں ہے۔ ہماری پارٹی کے اراکین ہیں اور دیگر جماعتوں کے ساتھ ہمارا الائنس ہے۔ دیگر اراکین نے بھی ہمیں تعاون کی یقین دہانی کرائی ہے‘۔

امیر مقام نے جوابی حملہ کرتے ہوئے کہا کہ دراصل یہ تو ایم ایم اے کے حکومت ترقیاتی منصوبوں کی لالچ دے کر ووٹروں کو اپنے ساتھ ملانے کی کوشش کر رہے ہیں۔

دوسری جانب ایم ایم اے اور اے این پی اس بات کے قائل نظر آتے ہیں کہ انتخابات میں کافی پیسہ چلا۔

عوامی نیشنل پارٹی کے صوبائی صدر بشیر بلور نے ہفتے کے روز سرحد اسمبلی میں ایک قرار داد پیش کی جس میں ایوان نے متفقہ طور پر مستقبل سینٹ انتخابات شو آف ہینڈ یا ہاتھ اٹھا کر ووٹ دینے کے طریقے کو رائج کرنے کا مطالبہ کیا۔ ایوان نے قرار داد منظور کی جس کا بظاہر مقصد اراکین کی خرید وفروخت کا تدارک کرنا ہے۔

بشیر بلور نے بتایا کہ ایم ایم اے، اے این پی اور پارلیمینٹرین کو ملا کر ان کے بانوے ترانوے ووٹ بنتے ہیں لیکن ہمیں ملے بہت کم ہیں۔ دوسری جانب ان کا کہنا ہے کہ دیگر جماعتوں کے صرف ستائیس اراکین بنتے ہیں لیکن انہیں ملے پچاس ووٹ ہیں۔ ’تو یقینا ہمارے اتحاد کے لوگوں نے انہیں ووٹ دیا‘۔

سرحد حکومت بھی سینیٹ کے انتخاب کے طریقہ کار کو تبدیل کرنے کی حامی ہے۔ وزیر اعلی سرحد اکرم خان درانی کا کہنا تھا کہ وہ پہلے بھی وفاقی حکومت سے اس نظام انتخاب کو تبدیل کرنے کا مطالبہ کرتے رہے ہیں۔ ’اگر ناظمین کا انتخاب شو آف ہینڈ کے ذریعے ہو سکتا ہے تو سینٹ کا کیوں نہیں‘۔

صوبہ سرحد میں سینیٹ کے انتخابات میں اکثر ووٹوں کی خریدو فروخت کے الزامات سامنے آتے رہے ہیں۔ اس مرتبہ بھی صورتحال میں کوئی تبدیلی دیکھنے کو نہیں ملی۔

مبصرین کے خیال میں ماضی کو دیکھتے ہوئے سرحد اسمبلی کی قرار داد سے شاید ہی اس طریقہ کار میں کوئی تبدیلی آئے۔