عزیزاللہ خان بی بی سی اردو ڈاٹ کام، کوئٹہ

	ڈیرہ بگٹی میں بارودی سرنگوں کے پھٹنے کے واقعات میں اضافہ ہوا ہے

ڈیرہ بگٹی کے ضلعی رابطہ افسر عبدالصمد لاسی نے بتایا کہ جمعرات کی صبح سوئی پٹ فیڈر روڈ پر جانی بیڑی کے مقام پر ایک گاڑی بارودی سرنگ سے ٹکرا گئی ہے جس میں سوار سیف الدین کلپر ہلاک اور اس کا بیٹا شمس الدین کلپر زخمی ہوا ہے۔

اسی طرح ایک دوسرے واقعے میں سوئی سفاری روڈ پر ایک مسافر پک اپ بارودی سرنگ سے ٹکرائی ہے جس میں سوار ایک خاتون اور دو بچوں سمیت چھ افراد زخمی ہوئے ہیں۔

بلوچستان میں ڈیرہ بگٹی اور کوہلو کے علاقوں میں بارودی سرنگوں کے پھٹنے کے واقعات میں اضافہ ہوا ہے جس میں ہلاکتیں بھی ہوئی ہیں۔

اس سلسلے میں ناظم ڈیرہ بگٹی کاظم بگٹی نے گزشتہ دنوں ایک سوال کے جواب میں کہا تھا کہ یہ بارودی سرنگیں حکومتی اہلکاروں اور مسلح قبائلیوں نے اپنے اپنے دفاع کے لیے نصب کی ہیں۔

لیکن ڈیرہ بگٹی کے ضلعی رابطہ افسر عبدالصمد لاسی کا کہنا تھا کہ حکومتی اہلکاروں کو بارودی سرنگیں نصب کرنے کی کوئی ضرورت نہیں ہے یہ بارودی سرنگیں مسلح قبائلیوں نے نصب کی ہیں۔