عزیزاللہ خان بی بی سی اردو ڈاٹ کام کوئٹہ

	گیس پائپ لائنوں پر بلوچ قوم پرستوں کی جانب سے حملے ہوتے رہے ہیں

گیس کمپنی کے جنرل مینیجر محمد نواز نے بتایا ہے کہ پائپ لائن کی مرمت کا کام شروع کر دیا گیا ہے اور جمعہ کی رات کسی وقت پائپ لائن مرمت کر لی جائے گی۔انہوں نے کہا کہ چھ انچ کی پائپ لائن کے کچھ اہم حصوں کو نقصان پہنچا ہے اور کوئی دو فٹ پائپ لائن کا ٹکڑا اڑ گیا ہے۔

گزشتہ ایک ہفتے کے دوران کوئٹہ میں گیس پائپ لائن پر یہ تیسرا حملہ ہے۔ گیس کمپنی کے حکام نے بتایا کہ بیس فروری کو ایک بم پھٹنے سے پہلے ناکارہ بنا دیا گیا تھا جبکہ بائیس اور اور اب چوبیس فروری کو دھماکے ہوئے ہیں جس کے بعد اب حفاظتی اقدامات سخت کیے جا رہے ہیں۔

اس کے علاوہ نوشکی کے علاقے میں نا معلوم افراد نے فرنٹیئر کور کی ایک چوکی پر راکٹ داغے ہیں لیکن کسی قسم کا کوئی جانی نقصان نہیں ہوا ہے۔

بلوچستان کے علاقے ڈیرہ بگٹی میں گیس پائپ لائن پر گزشتہ کچھ عرصہ میں کافی حملے ہوئے ہیں۔

ڈیرہ بگٹی کے ضلعی رابطہ افسر عبدالصمد لاسی نے گزشتہ دنوں بتایا تھا کہ پائپ لائن اور گیس کے کنوؤں پر حملوں کے نتیجے میں لوٹی اور پیرکوہ گیس پلانٹ کوئی ڈیڑھ ہفتہ پہلے بند کر دیے گئے تھے جس سے ملک میں کوئی نوے ملین کیوبِک فٹ گیس روزانہ کے حساب سے کمی واقعہ ہوئی ہے لیکن گیس کمپنی کے حکام متبادل ذرائع سے گیس کی ترسیل بحال رکھے ہوئے ہیں۔