ہارون رشید بی بی سی اردو ڈاٹ کام، پشاور

	مظاہرین آنسو گیس سے بچنے کے لیے بھاگ رہے ہیں

پولیس نے مظاہرین کو منتشر کرنے کے لیئے لاٹھی چارج کے علاوہ اشک آور گیس بھی استعمال کی ہے۔ اس کے علاوہ سولہ طلبہ کو حراست میں بھی لیا گیا ہے۔

پیر کی صبح پشاور کے مختلف کالجوں اور سکولوں کے طلبہ نے سڑکوں پر نکل کر پیغمبر اسلام کے چند یورپی اخبارات میں کارٹونوں کی اشاعت کے خلاف احتجاج کیا۔

پولیس کے مطابق تین سے چار ہزار تک کی تعداد میں مظاہرین نے جمع ہوکر صدر کے علاقے کا رخ کیا اور راستے میں مختلف مقامات پر ٹریفک لائٹس اور سائن بورڈز کو توڑا۔

’اللہ اکبر‘ اور ’امریکہ مردہ باد‘ جیسے نعرے لگاتے ان طلبہ نے خصوصاً ناروے کی موبائل کمپنی ٹیلی نور کو نشانہ بنایا۔ ڈنمارک کے بعد ناروے کے اخبارات نے یہ متنازعہ کارٹون شائع کیئے تھے۔

مظاہرین نے پشاور پریس کلب پر بھی پتھراؤ کیا اور عمارت کے شیشے توڑ دیے۔

تھانہ غربی پولیس کے مطابق سولہ افراد کو نجی املاک کو نقصان پہنچانے کے الزام میں حراست میں لےلیا ہے۔ تاہم آخری اطلاعات تک کسی کے خلاف کوئی مقدمہ درج نہیں ہوا تھا۔

پشاور میں کارٹونوں کے تنازعے کے سامنے آنے کے بعد سے روزانہ مختلف عوامی حلقے احتجاجی مظاہرے منعقد کر رہے ہیں تاہم یہ اب تک ہونے والا سب سے زیادہ پرتشدد مظاہرہ تھا۔