عزیزاللہ خان بی بی سی اردو ڈاٹ کام، کوئٹہ

	لوٹی گیس پلانٹ کی پانی کی پائپ لائن کو تاحال مرمت نہیں کیا جا سکا

دوسری طرف نیم فوجی دستے کی ایک گاڑی بارودی سرنگ سے ٹکرا گئی ہے جس سے تین اہلکاروں کے زخمی ہونے کی اطلاع ہے لیکن اس کی سرکاری سطح پر تصدیق نہیں ہو سکی۔

ڈیرہ بگٹی کے ضلعی رابطہ افسر عبدالصمد لاسی نے کہا ہے کہ نامعلوم افراد نے گیس پلانٹ کو پانی مہیا کرنے والی پائپ لائن کو دھماکہ خیزمواد سے اڑا دیا ہے جس سے پلانٹ اور قریبی آبادی کو پانی کی ترسیل منقطع ہو گئی ہے۔

انہوں نے کہا ہے کہ کمپنی کے پاس کچھ دنوں کا پانی ذخیرہ ہے اور ادھر ایف سی نے متبادل پانی کی ترسیل شروع کر دی ہے۔ اس پائپ لائن کو پہلے بھی دھماکہ خیز مواد سے اڑا دیا گیا تھا جس کو مرمت کر لیا گیا تھا۔ لوٹی گیس پلانٹ کی پانی کی پائپ لائن کو تاحال مرمت نہیں کیا جا سکا جہاں عبدالصمد لاسی کے مطابق بڑی تعداد میں بارودی سرنگیں بچھائی گئی ہیں۔

جمہوری وطن پارٹی کے جنرل سیکرٹری آغا شاہد بگٹی نے کہا ہے اس پائپ لائن کو دو جگہوں سے دھماکہ خیز مواد سے اڑایا گیا ہے ۔ انھوں نے کہا ہے مقامی لوگوں کے مطابق کمپنی کے ساتھ طے شدہ معاہدہ تیس دسمبر تک تھا جو ختم ہو چکا ہے لہذا اب کمپنی کو پانی فراہم نہیں کیا جا سکتا۔

انہوں نے کہا ہے کہ ان کی اطلاع کے مطابق ڈیرہ بگٹی میں پتھر نالہ کے قریب ایف سی کی ایک گاڑی بارودی سرنگ سے ٹکرا گئی ہے جس سے تین اہلکار زخمی ہوئے ہیں لیکن ڈی سی او ڈیرہ بگٹی نے اس کی تردید کی ہے اور کہا ہے کہ عید کے دنوں میں دو مرتبہ ایسے حادثے پیش آچکے ہیں آج یا کل ایسا کوئی حادثہ پیش نہیں آیا ہے۔

عبدالصمد لاسی نے کہا ہے کہ گزشتہ روز شام کو ڈیرہ بگٹی ٹاؤن کے قریب گولہ باری کا تبادلہ ہوا تھا لیکن کسی قسم کے کوئی جانی نقصان کی اطلاع نہیں ملی۔

اس کے علاوہ خضدار کے قریب وڈھ کے مقام پر ایک زیر تعمیر عمارت مں دھماکہ ہوا ہے جس سے عمارت کا ایک کمرہ تباہ ہو گیا ہے۔ وڈھ کے پولیس افسر غلام مصطفی نے بتایا ہے کہ یہ عمارت ایک سکول کے اساتذہ کی رہائش کے لیے تعمیر کی جا رہی تھی۔