عدنان عادل بی بی سی اردو ڈاٹ کام، لاہور

	بس سروس کا ٹرائل رن گزشتہ تیرہ دسمبر کو ہوا تھا

بس صبح نو بجے لاہور سے روانہ ہوئی تو ریشماں بہت خوش تھیں۔ انہوں نے گانے گائے اور کہا کہ وہ ’چار دناں دا پیار ربا تے لمبی جدائی‘ کا گانا اب نہیں گائیں گی۔ انہوں نے کہا کہ وہ اب خوشی کے گیت گائیں گی۔

طویل بیماری سے نحیف ریشماں کے ساتھ ان کی بیٹی شازیہ بھی امرتسر گئی ہیں۔ وہ دونوں امرتسر سے دلی جائیں گی جہاں خواجہ نظام الدین اولیاء اور حواجہ بختیار کاکی کے مزاروں پر حاضری دیں گی اور وہاں سے راجستھان جائیں گی۔

ریشماں نے کہا کہ بس کا شروع ہونا ایک اچھی پیش رفت ہے۔ ’خدا گواہ ہے۔ لوگوں کی مصیبت دور ہوئی۔ بس میں جانا تو اور ہی بات ہے۔‘

بھارت سے پاک بھارت کرکٹ میچ دیکھنے آئی ہوئی ایک خاتوں مونیکا ورما پیدل واہگہ سرحد عبور کرکے لاہور آئی تھیں۔ وہ بھی بس سے واپس گئی ہیں۔ انہوں نے کہا کہ وہ بہت خوش ہیں۔ ’اچھا لگ رہا ہے کہ ہم بھی اس چیز کا حصہ بنے۔‘

انہوں نے کہا کہ انہیں لگتا ہے کہ اب سفر لوگوں کے لیے بہت آسان ہوجائے گا۔ ’یہ بالکل ایسا ہے جیسے آپ ایک شہر سے دوسرے شہر میں بس سے چلے جائیں۔‘

پاکستان ٹوارزم ڈیویلپمنٹ کارپوریشن جوبس چلارہی ہے اس کے ڈپٹی منیجر منصور اعظم نے کہا کہ اس بس سے اس لیے کم مسافر جارہے ہیں کہ یہ آنے جانے کا موسم نہیں ہے، اسکول اور کالج کھلے ہوئے ہیں۔ ان کا کہنا تھا کہ زیادہ تر لوگ چھٹیوں میں سفر کرتے ہیں۔

انہوں نے کہا کہ ایک وجہ یہ بھی ہے کہ جب امرتسر کے لیے ویزے ملنے شروع ہوں گے تو مسافروں کی تعداد میں اضافہ ہوگا۔

سرکاری افسر نے بتایا کہ جب دلی کے لیے بس سروس شروع کی گئی تھی تو اس سے زیادہ مسافر اس لیے گئے تھے کہ پہلے ایک ماہ کے لیے یہ رعایت دی گئی تھی کہ جن لوگوں کے پاس ٹرین سے جانے کے ویزے ہیں وہ بھی بس سے جاسکتے ہیں۔ تاہم اس بار ایسا نہیں کیا گیا۔

انہوں نے بتایا کہ لوگوں کو بھارت کے وزٹ ویزے ملنے ابھی شروع نہیں ہوئے بلکہ ویزے صرف ان لوگوں کو مل رہے ہیں جن کے وہاں پر عزیز رشتے دار رہتے ہیں یا کوئی تجارت ہے۔

بس میں سات پاکستانی مسافر، دو بھارتی مسافر، پندرہ پاکستانی حکام، عملہ کے دو افرد سمیت کل اٹھائیس افراد امرتسر گئے ہیں جو لاہور سے تقریبا پچاس کلومیٹر کی مسافت پر واقع ہے۔

یہ بس کل لاہور واپس آئے گی جبکہ بھارت سے چلنے والی بس اگلے منگل کو لاہور آئے گی اور اگلے دن واپس جائےگی۔