علی سلمان بی بی سی اردو ڈاٹ کام، لاہور

	بس کا کرایہ پاکستانی کرنسی میں 900 روپے اور بھارتی کرنسی میں750 روپے ہوگا

تقسیم ہند کے بعد سے ان دونوں شہروں کے درمیان پبلک ٹرانسپورٹ کا سلسلہ منقطع ہے لیکن اب دنوں ملکوں کے حکام نے ان شہروں کے درمیان بس سروس بحال کرنے کا فیصلہ کیا ہے۔

اسی سلسلے میں اتوار کو بھارت کے شہر امرتسر سے بھارتی حکام اور بس سروس کے عملے پر مبنی ایک نو رکنی وفد تقریباً پچاس کلومیٹر کا سفر کرنے کے بعد لاہور پہنچا ہے۔

لاہور کے واہگہ باڈر پر پاکستان ٹورازم کارپوریشن کے افسران اور دیگر حکام نے اس بھارتی وفد کا استقبال کیا جس کی سربراہی مشرقی پنجاب کے سیکرٹری ٹرانسپورٹ اے آر توار کر رہے ہیں۔

بھارتی وفد کے سربراہ نے اس موقع پر ذرائع ابلاغ کے نمائندوں سے گفتگو کرتے ہوئے بھارت اور پاکستان کے درمیان اس نئی بس سروس کی تفصیلات بتائیں۔ انہوں نے بتایا کہ دونوں شہروں سے ہر ہفتے دو بسیں چلا کریں گی۔ انہوں نے یہ بھی بتایا کہ اس بس کا کرایہ پاکستانی کرنسی میں نو سو روپے اور بھارتی کرنسی میں ساڑھے سات سو روپے ہوگا۔

امرتسر سے لاہور آنے والے بھارتی شہری کو ابھی بھی ویزہ لینے کے لیے دہلی ہی جانا ہوگا اور پھر امرتسر واپس آکر بس کا سفر کر نا ہوگا اے آر توار

پاکستان ٹوارزم ڈویلپمنٹ کارپوریشن (پی ٹی ڈی سی) اور امرتسر روڈ ویز کی ایک ایک بس دونوں شہروں کے درمیان سفر کے لیے استعمال ہوگی۔ یوں امرتسر سے لاہور اور لاہور سے امرتسر کے درمیان سفر کرنے والوں کو دو دو مرتبہ سفر کی سہولت حاصل رہے گی۔

بھارتی وفد جس بس میں آیا ہے اس میں ڈرائیور اور کنڈیکٹر کے علاوہ پینتالیس مسافروں کی گنجائش ہے۔ بھارتی وفد کے سربراہ نے بتایا کہ ان کے اس دورے کا مقصد فنی معاملات کا جائزہ لینا ہے اور اس سفر کے دوران بھارتی ڈرائیور اور کنڈکٹر نے بھی راستہ دیکھ اور سمجھ لیا ہے۔

ایک سوال کے جواب میں انہوں نے کہا کہ امرتسر سے لاہور آنے والے بھارتی شہری کو ابھی بھی ویزہ لینے کے لیے دہلی ہی جانا ہوگا اور پھر امرتسر واپس آکر بس کا سفر کر نا ہوگا۔ انہوں نے کہا کہ بھارتی حکام پہلے ہی پاکستان کو تجویز پیش کر چکے ہیں کہ امرتسر میں ایک ویزہ سیکشن کھول دیا جائے۔

یہ وفد لاہور میں ایک روز قیام کے بعد واپس چلا جائےگا اور منگل کو اسی طرح پاکستان کا ایک وفد اپنی بس لیکر لاہور سے امرتسر جائے گا۔

پاکستان ٹورازم ڈویلپمنٹ کارپوریشن کے منیجنگ ڈائریکٹر ہاشم خان نے توقع ظاہر کی ہے کہ تئیس دسمبر سے لاہور سے امرتسر تک بس سروس باقاعدہ طور پر شروع ہو جائے گی اور اگلے مرحلے میں امرتسر سے سکھوں کے مقدس شہر ننکانہ صاحب تک بس سروس شروع کی جائے گی۔

بھارت اور پاکستان کے درمیان ڈھائی سال پہلے دہلی اور لاہور کے درمیان بس سروس بحال ہوگئی تھی جس کے بعد اس سال کنٹرول لائن کے آر پار سری نگر اور مظفر آباد کے درمیان بس سروس کا اجراء ہوا۔ اب اس نئی سروس کی بحالی کے ساتھ دونوں اطراف کے پنجاب کے درمیان تقسیم ہند کے بعد یہ پہلی باضابطہ بس سروس ہوگی۔

بس سروس کے علاوہ آئندہ ڈیڑھ ماہ کے اندر کھوکھراپار مناباؤ ٹرین سروس کا اجراء بھی متوقع ہے۔ دونوں ملکوں کے درمیان ہوائی جہاز کی سروس بھی چل رہی ہےلیکن دونوں ملکوں کے درمیان دوستی کے حامی حلقے سوا ارب کی آبادی کے درمیان ان تمام رابطوں کو ابھی بھی انتہائی ناکافی قرار دیتے ہیں۔