عدنان عادل بی بی سی اردو ڈاٹ کام، لاہور

	اخباری اداریوں میں کالاباغ کی تعمیر میں تاخیر کو درست فیصلہ قرار دیا گیا ہے

دی نیشن نے اپنے اداریہ میں لکھا ہے کہ صدرمشرف نے اپنے خطاب میں باجوڑ میں حالیہ امریکی بمباری پر بالکل بات ہی نہیں کی جو قابل تشویش بات ہے۔

روزنامہ جنگ لاہور کےمدیر ارشاد حقانی نے بھی اپنے تبصرہ میں یہی موقف اختیار کیا ہے کہ باجوڑ پر صدر کی خاموشی عوامی توقعات کے منافی ہے اور اس سے ان خدشات کو تقویت ملتی ہے جو بعض حلقوں کی طرف سے پیش کیے جاتے ہیں کہ پاکستان امریکہ کا تابع مہمل بن چکا ہے اور اپنی حاکمیت کی خلاف ورزی پر احتجاج بھی نہیں کرسکتا۔

تاہم جنگ کے ادارتی صفحہ پر صدر مشرف کی تقریر کی تعریف میں اداریہ سمیت چار مضامین شائع ہوئے ہیں جن میں بھاشا ڈیم بنانے کے فیصلہ کو اہم، تاریخی اور درست کہا گیا ہے جبکہ ان کی تقریر کو مدلل اور مدبرانہ کا عنوان دیا گیا ہے۔

روزنامہ جنگ نے ہی اپنے ادارتی نوٹ میں تبصرہ کیا ہے کہ صدر پرویز مشرف نے قومی مالیاتی ایوارڈ میں ترمیم اور بڑے ڈیموں کی تعمیر کے حوالہ سے جو اعلانات کیے ہیں ان سے طویل عرصہ سے جاری تذبذب کی کیفیت ختم کرنے میں مدد ملے گی۔

دی نیوز نے آج جمعرات کواپنے اداریہ میں لکھا ہے کہ مشرف نے کالاباغ کو چھوڑ کر بھاشا اورمنڈا ڈیم بنانے کا اعلان کرکے صحیح معنوں میں ’پاکستان پہلے‘ پر عمل کیا ہے۔

باجوڑ پر صدر کی خاموشی عوامی توقعات کے منافی ہے اور اس سے ان خدشات کو تقویت ملتی ہے جو بعض حلقوں کی طرف سے پیش کیے جاتے ہیں کہ پاکستان امریکہ کا تابع مہمل بن چکا ہے اور اپنی حاکمیت کی خلاف ورزی پر احتجاج بھی نہیں کرسکتا ارشاد حقانی

اخبار کا خیال ہے کہ جب تک حکومت کالاباغ ڈیم کے ناقدین کو قائل کرنے کے لیے حقیقی کوششیں نہیں کرتی اس وقت تک قومی مالیاتی ایوارڈ کے ذریعے صوبوں کو دیے جانے والے فوائد کا زیادہ اثر نہیں ہوگا۔

روزنامہ دی نیشن نے تبصرہ کیا ہے کہ صدر مشرف پہلے سربراہ مملکت ہیں جنہوں نے ڈیم کے معاملہ کو ایک مشن کے طور پر لیا اور صوبہ سرحد اور سندھ میں اس معاملہ پر عوامی جلسے بھی کیے۔

اخبار کا کہنا ہے کہ صدر مشرف کو اس معاملہ پر سب سے زیادہ مزاحمت سندھ سے ملی جہاں ان کی ذاتی اور آئینی ضمانتیں بھی ان کے قریبی اتحادیوں کو قائل نہیں کرسکیں جس سے صوبوں کے درمیان عدم اعتماد کی گہرائی کا اندازہ لگایا جا سکتا ہے۔

	کالاباغ ڈیم کی تعمیر کے خلاف صوبہ سندھ میں ہونے والا ایک مظاہرہ

روزنامہ ڈان نے اپنے اداریہ میں کہا ہے کہ کالاباغ ڈیم کے معاملہ سے جس طرح نپٹا گیا ہے اس جذبہ کو زندہ رکھنے کی ضرورت ہے اور ملک کے لیے صوبائی خود مختاری بہت اہمیت کی حامل ہے۔ اخبار کا کہنا ہے کہ صدر نے قومی مالیاتی ایوارڈ کا عبوری اعلان کرکے اچھا کیا لیکن حکومت کواس کا مستقل حل بھی نکالنا چاہیے۔

ڈیلی ٹائمز نے اپنے اداریہ میں لکھا ہے کہ کالاباغ ڈیم نہ بنانے کا فیصلہ صدر مشرف کی ایسی پسپائی ہے جسے دراصل پیش قدمی کہا جاسکتا ہے۔ اخبار کا خیال ہے کہ اس فیصلہ سے سندھ کے ایک سیاستدان کے سوا ساری قوم نے اطمینان کا سانس لیا ہے کہ محاذ آرائی بالآخر ختم ہوئی۔

صدر مشرف کو اس معاملہ پر سب سے زیادہ مزاحمت سندھ سے ملی جہاں ان کی ذاتی اور آئینی ضمانتیں بھی ان کے قریبی اتحادیوں کو قائل نہیں کرسکیں جس سے صوبوں کے درمیان عدم اعتماد کی گہرائی کا اندازہ لگایا جاسکتا ہے۔ دی نیشن

اخبار نے تجزیہ کیا ہے کہ پیپلزپارٹی میں ڈیم کے معاملہ پر اختلافات ہیں اور اس کے کچھ سندھی رہنما کسی بھی ڈیم کے بنائے جانے کے خلاف ہیں اور کچھ سکردو ڈیم بنانے کے حق میں ہیں۔ اخبار کہتا ہے کہ دیکھنا یہ ہے کہ اب پیپلزپارٹی کیا موقف اختیار کرے گی۔

ڈیلی ٹائمز کا یہ بھی کہنا ہےکہ کالاباغ ڈیم پر پسپائی، قومی مالیاتی ایوارڈ میں صوبوں کے لیے نرمی اور زلزلزلہ کے بعد تعمیر نو سے صدر مشرف کو وہ ہوا مل جائے گی جو سنہ دو ہزار سات کے الیکشن میں جانے اور وردی نہ اتارنے کےلیے انہیں درکار ہے لیکن اخبار کے خیال میں سنہ دو ہزار سات کے بعد منظر سے نہ ہٹنا صدر مشرف کی غلطی ہوگی۔