مبشر زیدی بی بی سی اردو ڈاٹ کام، اسلام آباد

	صدر نوابشاہ اور میر پور خاص سمیت کئی سندھی شہروں کا عنقریب دورہ کریں گے

راولپنڈی میں ہونے والے اس اجلاس کے بعد وزیر اطلاعات شیخ رشید نے بی بی سی کو بتایا کہ اجلاس میں اس بات پر اتفاق رائے پایا گیا کہ ملک میں نئے ڈیموں کی تعمیر ناگزیر ہے اور نئے ڈیم پاکستان کی زندگی ہیں۔

ان کے مطابق صدر عنقریب نوابشاہ اور میر پور خاص سمیت کئی سندھی شہروں کا دورہ کریں گے اور نئے آبی ذخائر کے بارے میں صوبے میں پائے جانے والے خدشات دور کرنے کی کوشش کریں گے۔

وزیر اطلاعات نے یہ بھی بتایا کہ حکمران مسلم لیگ کے عہدیداران کو یہ ذمہ داری سونپی گئی ہے کہ وہ جماعت کے اندر ان آبی ذخائر کے بارے میں لوگوں کو اعتماد میں لیں اور ان کے ذہنوں میں پائے جانے والے خدشات کو دور کریں۔

شیخ رشید نے کہا کہ اجلاس میں پورے ملک کی سیاسی صورتحال پر بھی غور کیا گیا۔

بلوچستان میں جاری فوجی کاروائی کے بارے میں شیخ رشید کا کہنا تھا کہ وہاں کسی خاتون اور عام شہری کے خلاف کاروائی نہیں کی جا رہی۔ انہوں نے کہا کہ کاروائی صرف دہشت گردوں کے ٹریننگ کیمپ ختم کرنے کے لیے کی جا رہی ہے۔

انہوں نے کہا کہ حکومت کی طرف سے حزب اختلاف اور میڈیا کو بلوچستان کا دورہ کرنے کی مکمل آزادی ہے اور وہ اگر وہاں جانا چاہیں تو حکومت ان کو لے جائے گی۔