عزیزاللہ خان بی بی سی اردو ڈاٹ کام، کوئٹہ

	مذاکرات ہی مسائل کا واحد حل ہے: اسفند یار ولی

کوئٹہ کے دورے کے دوران کوئٹہ پریس کلب میں صحافیوں سے باتیں کرتے ہوئے اسفندیار ولی نے کہا ہے ان کی جماعت بلوچستان میں فوجی کارروائی کی سخت مذمت کرتی ہے۔

ان کا کہنا تھا کہ اگر صدر پرویز مشرف کے دورے کے دوران راکٹ باری کو اس کارروائی کا جواز بنایا گیا ہے تو پھر پنڈی کے جی ایچ کیو اور کراچی میں چھاؤنی کے قریب بھی ان پر حملے ہوئے ہیں، وہاں فوجی کارروائی کیوں نہیں کی گئی؟

ایک سوال کے جواب میں انہوں نے کہا کہ’مذاکرات ہی مسائل کا واحد حل ہے اور مذاکرات برابری کی بنیاد پر ہونے چاہئیں اور صوبوں کو ان کے وسائل پر حق دینا چاہیے۔ایک ہی صوبے کی من مانیاں کب تک چلیں گی‘۔

اسفندیار ولی نے کہا کہ’ ہمیں دیوار سے لگایا گیا ہے اب یہ ہم پر منحصر ہے کہ ہم اگلے کے پاؤں پڑیں یا گریبان سے پکڑیں۔ میں باچا خان کا پوتا ہوں پاؤں تو نہیں پڑوں گا‘۔ ان کا کہنا تھا کہ انتیس دسمبر کو وہ کالاباغ کے خلاف مظاہرہ کریں گے اور تیس دسمبر کو پارلیمنٹ کے سامنے بلوچستان کے حوالے سے احتجاج کیا جائے گا۔

اسفندیار ولی نے کہا کہ کالاباغ کے حوالے سے حکومت متضاد دعوے کر رہی ہے اور یہ لوگ’ کبھی کہتے ہیں نہریں نکالی جائیں گی اور کبھی کہتے ہیں نہریں نہیں نکالی جائیں گی‘۔ آئینی ضمانت کے حوالے سے ان کا کہنا تھا کہ آئین کتنی مرتبہ توڑا گیا ہے‘۔