اعجاز مہر بی بی سی اردو ڈاٹ کام، اسلام آباد

	وزیراعلیٰ سندھ کالا باغ ڈیم کے معاملے کو مزید متنازعہ بنانے سے پرہیز کریں

وزیراعلیٰ سندھ نے چند روز قبل سندھ کی صوبائی اسمبلی میں پالیسی بیان دیتے ہوئے کہا تھا کہ کالا باغ ڈیم سندھ کے مفادات کے خلاف ہے اور پنجاب رائلٹی حاصل کرنے کے لیے ڈیم بنانا چاہتا ہے۔

انہوں نے یہ بیان اس وقت دیا تھا جب اسی روز شام کو انہیں صدر جنرل پرویز مشرف کی جانب سے کالا باغ ڈیم کی متعلق ایک اہم اجلاس میں شرکت کرنی تھی۔

شیخ رشید احمد نے بی بی سی سے بات کرتے ہوئے کہا کہ وزیراعلیٰ سندھ کالا باغ ڈیم کے معاملے کو مزید متنازعہ بنانے سے پرہیز کریں۔ تاہم انہوں نے کہا حکومت ڈیم کے متعلق غلط فہمیاں دور کرنے کے لیے وسیع پیمانے پر میڈیا مہم بھی شروع کرنے والی ہے۔

انہوں نے کہا کہ اس مہم کا خاص مقصد صوبہ سندھ اور سرحد کے عوام کو قائل کرنا ہے کیونکہ ان کے بقول دونوں صوبوں کے عوام کو کچھ عناصر نے گمراہ کر رکھا ہے۔

واضح رہے کہ وزیراعلیٰ نے صوبائی اسمبلی میں کہا تھا کہ کالا باغ ڈیم انہیں ہرگز قبول نہیں اور وہ ہر فورم پر اس کی مخالفت کریں گے اور اگر انہیں مستعفی ہونا پڑا تو وہ ایسا کرنے کے لیے بھی تیار ہیں۔

صدر جنرل پرویز مشرف کہتے رہے ہیں کہ وہ سندھ کو کالا باغ ڈیم سے نقصان نہ پہنچنے کی آئینی ضمانت بھی فراہم کرنے کے لیے تیار ہیں۔ صدر مملکت کا نام لیے بنا ارباب غلام الرحیم نے کہا تھا کہ’ کس آئین کی گارنٹی کی بات کی جاتی ہے۔ اس کی جس میں جب چاہیں تبدیلی کی جاسکتی ہو‘۔