ہارون رشید بی بی سی اردو ڈاٹ کام، پشاور

	حکام نے خیمہ بستیوں میں آگ جلانے پر سخت پابندی لگا رکھی ہے

اس آتشزدگی سےآٹھ خیموں کو بھی نقصان پہنچا ہے۔

بالاکوٹ میں امدادی کارکنوں نے بتایا کہ آگ بسیاں کے مقام پر ایک خیمہ بستی میں بھڑکی جس سے آٹھ خیموں کو اپنی لپیٹ میں لے لیا۔ اس آگ سے تین بچوں کو معمولی زخم آئے ہیں۔

یہ آگ منگل کی رات خیمے کے اندر کھانا پکانے سے شروع ہوئی تھی۔ حکام نے خیمہ بستیوں میں آگ جلانے پر سخت پابندی لگا رکھی ہے لیکن پھر بھی وقتاً فوقتاً اس قسم کے واقعات سامنے اتے رہتے ہیں۔

ادھر فوجی حکام کی جانب سے پشاور میں جاری ایک بیان میں کہا گیا ہے کہ بالاکوٹ میں بدھ کے روز ڈیڑھ سو ٹرک ملبہ ہٹایا جبکہ پچاس متاثرہ خطرناک مکانات کو مہندم بھی کیا گیا۔

پشاور میں ہی وزیرِاعلٰی سرحد اکرم خان درّانی کی صدارت میں صوبائی کابینہ کے ایک اجلاس میں بالاکوٹ میں موسم گرما سے پہلے قدرتی آفات سے محفوظ ماڈل سٹی قائم کرنے کا فیصلہ کیا گیا ہے۔ کابینہ نے متاثرین کے اس موقف کی تائید کی کہ انہیں ان کے مکانات خود تعمیر کرنے کی اجازت دی جائے۔