مبشر زیدی بی بی سی اردو ڈاٹ کام، اسلام آباد

	مصطفٰی نصر المعروف ابومصعب السوری کے سر کی قیمت پچاس لاکھ ڈالر رکھی گئی تھی

شیخ رشید نے بی بی سی سے بات کرتے ہوئے کہا کہ القاعدہ کے کسی اہم رہنما کو گرفتار نہیں کیا گیا ہے۔ان کا کہنا تھا کہ ذرائع ابلاغ میں اس بارے میں آنے والی تمام خبریں افواہوں پر مبنی ہیں۔

اس سے قبل خبر رساں اداراے ایسوسی ایٹڈ پریس کے مطابق انٹیلی جنس افسران نے کہا تھا کہ سوبہ بلوچستان کے دارالحکومت کوئٹہ میں ایک چھاپے کے دوران دو افراد کو گرفتار کیا گیا ہے۔اس چھاپے کے دوران ایک سعودی شخص ہلاک بھی ہو گیا۔

پاکستان کے وزیرِاطلاعات شیخ رشید نے خبررساں ادرارے اے ایف پی کو بتایا ہے کہ’ منگل کو سکیورٹی فورسز نے جب کوئٹہ میں ایک گھر پر چھاپہ مارا تو انہیں مقابلے کا سامنا کرنا پڑا۔ مقابلے کے بعد انہوں نے ایک غیر ملکی کو ہلاک جبکہ دوسرے کو گرفتار کر لیا جن کے بارے میں شبہ ہے کہ ان کا تعلق القاعدہ سے ہے‘۔

	کوئٹہ میں وہ دوکان بند ہے جہاں سے القاعدہ کے مشتبہ اراکین کو پکڑا گیا ہے

ایک سینیئر حکومتی اہلکار کا کہنا ہے کہ حکام اس بات کا پتہ لگانے کی کوشش کر رہے ہیں کہ گرفتار شدگان میں سے ایک مصطفٰی ستماریان نصر تو نہیں۔ ان کا کہنا تھا کہ ’ ہم اس بات کی تصدیق کرنے کی کوشش کر رہے ہیں کہ گرفتار شدہ شخص شامی نژاد مصطفٰی ستماریان نصر تو نہیں جس پر پانچ ملین ڈالر کا انعام ہے‘۔

کوئٹہ سے تعلق رکھنے والے خفیہ اہلکاروں کا کہنا ہےکہ گرفتار کیا جانے والا دوسرا شخص کالعدم تنظیم جیشِ محمد سے تعلق رکھتا ہے۔ ان کا یہ بھی کہنا تھا کہ ان دونوں افراد کی گرفتاری کے لیے مارے جانے والے چھاپے کے دوران فائرنگ کا تبادلہ بھی ہوا جس کے دوران سعودی عرب سے تعلق رکھنے والا ایک تیسرا مشتبہ شخص شیخ علی محمد السلیم ہلاک ہو گیا۔

مصطفٰی نصر کا نام مارچ سنہ 2004 میں میڈرڈ میں ہونے والے ٹرین بم دھماکوں کی ذمہ دار کلیدی شخصیت کے طور پر لیا جاتا رہا ہے اور امریکہ نے گزشتہ برس مصطفٰی نصر عرف ابو مصعب السوری کی گرفتاری سے متعلق اطلاع دینے پر پچاس لاکھ امریکی ڈالر انعام کا اعلان بھی کیا تھا۔