اعجاز مہر بی بی سی اردو ڈاٹ کام، اسلام آباد

	حکومت نے زلزلہ متاثرین کی مالی امداد کی پالیسی تبدیل کر دی ہے۔

سنیچر کے روز وزیراعظم شوکت عزیز کی صدارت میں کابینہ کی خصوصی کمیٹی کے اجلاس میں زلزلے سے متاثرہ دیہی اور دور دراز کے علاقوں میں رہنے والوں کو ایک کمرے کا مکان تعمیر کرنے کے لیے پچیس ہزار روپے دینے کی منظوری دی گئی ہے۔ جبکہ فی زخمی دس ہزار روپے تقسیم کرنے کا بھی فیصلہ کیا گیا ہے۔

زلزلے کے فوری بعد حکومت نے فی ہلاک شدگان ایک لاکھ روپے اور فی زخمی پچاس ہزار روپے دینے کا اعلان کیا تھا۔ لیکن چند روز قبل حکومت نے فیصلہ کیا کہ فی متاثرہ خاندان ایک لاکھ روپے دیے جائیں گے۔

حکومت کے آئے روز مالی امداد کی مقدار کم کرنے پر متاثرین پہلے ہی شدید غم و غصہ ظاہر کرچکے ہیں جبکہ پاکستان کے زیرانتظام کشمیر اور صوبہ سرحد کی حکومتوں نے بھی متاثرین کی مالی امداد گھٹانے پر افسوس ظاہر کیا ہے۔

وزیراعظم نے کہا ہے کہ آٹھ اکتوبر کو آنے والے شدید زلزلے میں ہونے والے جانی اور مالی نقصان کا تخمینہ پندرہ نومبر تک لگالیا جائے گا۔ ان کے مطابق تاحال مرنے والوں کی تعداد پچپن ہزار جبکہ زخمیوں کی اناسی ہزار ہوچکی ہے۔

وفاقی حکومت کی جانب سے پیش کردہ ان اعداد وشمار کو کشمیر اور صوبہ سرحد کی حکومتوں نے چیلینج کرتے ہوئے دعویٰ کیا ہے کہ زلزلے سے مرنے اور زخمی ہونے والوں کی تعداد اس سے کہیں زیادہ ہے۔

وزیراعظم نے بتایا کہ انیس نومبر کو اسلام آْباد میں عالمی ڈونر کانفرنس منعقد ہوگی جس میں اقوام متحدہ کے سیکریٹری جنرل کوفی عنان، سابق امریکی صدر بل کلنٹن، عالمی اور ایشیائی بینکوں کے صدور بھی شریک ہوں گے۔

ادھر ایران کے صدر کے سینیئر مشیر اور نائب صدر ڈاکٹر علی سعید لو نے پریس کانفرنس میں بتایا ہے کہ ان کا ملک پاکستان کو بیس کروڑ ڈالر اور دس ہزار خیمے دے گا۔ ان کے مطابق وہ ایک ہزار خیمے اپنے ساتھ لائے ہیں اور باقی ایک ہفتے تک پاکستان پہنچیں گے۔