مبشر زیدی بی بی سی اردو ڈاٹ کام، اسلام آباد

سرکاری ٹی وی اور ریڈیو پر قوم سے اپنے خطاب میں صدر نے کہا کہ وہ بھارت کے شکر گزار ہیں

صدر نے کہا کہ انہیں کہا گیا کہ وہ (بھارت) کہہ رہے ہیں کہ وہ ہیلی کاپٹر دے دیں گے اور ہیلی کاپٹر پاکستانی پائلٹ اڑا لیں۔ انہوں نے کہا کہ کل جب ہم نے کہا کہ وہ ہمیں قبول ہے تو اس میں غلط فہمیاں دور ہو جانی چاہیں۔

صدر نے اس سے قبل اپنے خطاب میں کہا کہ پاکستان میں زلزلے سے متاثرہ علاقوں میں خیمے اور کمبل بڑی تعداد میں چاہیے ہیں۔ انہوں نے کہا کہ زلزلے سے متاثرہ علاقوں میں تعمیر نو کے لیے ارتھ کوئیک ریکنسٹرکشن اینڈ ری ہیبلیٹیشن اتھارٹی قائم کی گئی ہے جس کا سربراہ جنرل زبیر کو مقرر کیا گیا ہے۔

انہوں نے کہا کہ حکومتی عمارتوں اور سکولوں اور گھروں کی دوبارہ تعمیر نو کرنی ہے۔ انہوں نے کہا کہ ہم تیزی سے دوبارہ گھر بنائیں گے۔

ہم کوئی سالوں میں گھر بنانے کے حق میں نہیں ہیں۔ یہاں اب ایسی ایسی ٹیکنولوجی آ گئی ہے جس سے چند دن میں چند گھنٹوں میں گھر بن سکتے ہیں۔ لہذا ہم ایسی ٹیکنولوجی لائیں گے جس میں ہم تیزی سے گھر بنائیں گے۔وہاں فیکٹریاں لگائیں گے اور لوگوں کو روز گار دیں گے۔

انہوں نے کہا کہ فوج نے اپنا تمام اضافی سامان جس میں خیمے اور کمبل ہیں وہ امدادی کاموں کے لیے دے دیا ہے۔

جنرل پرویز مشرف نے کہا کہ زلزلے سے متاثرہ افراد کے لیے پاکستانیوں نے ابھی تک چار ارب روپے کے عطیات دیے ہیں جبکہ بین الاقوامی برادری نے چھے سو بیس ملین ڈالر کی امداد دی ہے۔ صدر کے مطابق اس پیسے میں سے ابھی ایک پیسہ بھی خرچ نہیں کیا گیا اور یہ پیسہ متاثرہ افراد کے گھروں کی دوبارہ تعمیر اور لوگوں کی بحالی کے کام میں خرچ کیا جائے گا۔

صدر نے کہا کہ تمام متاثرہ علاقوں میں فوج کا جال بچھا ہوا ہے اور ان علاقوں میں فوج کے پینتالیس مرکز بنائے گئے ہیں جہاں سے امدادی کام کو مربوط طریقے سے متاثرہ افراد میں تقسیم کیا جا سکتا ہے۔

جنرل پرویز مشرف نے اس موقع پر بین الاقوامی برادری سے اپیل کی کہ وہ زلزلے سے متاثرہ افراد کے لیے مالی امداد میں مزید عطیات دیں۔

صدر نے کہا کہ تمام متاثرہ علاقوں میں ٹیلی مواصلات کی بحالی کا کام جاری ہے۔