اعجاز مہر
بی بی سی اردو ڈاٹ کام، اسلام آباد |  |
| | | بھارت کے علاوہ اور بھی کئی ملکوں سے امداد پاکستان پہنچ رہی ہے |
پاکستان میں زلزلے سے متاثرہ افراد کے لیے امدادی سامان لے کر بھارت کا ایک خصوصی طیارہ بدھ کو علی الصبح اسلام آباد پہنچ گیا ہے۔ دفتر خارجہ کی ترجمان تسنیم اسلم نے بی بی سی کو بتایا کہ بھارت سے پہنچنے والے سامان میں تین ہزار کمبل، پچاس خیمے، بارہ ٹن ادویات اور ’پلاسٹک شیٹس، شامل ہیں۔ پاکستان کی تاریخ میں پہلی بار دفتر خارجہ کی ترجمان بننے والی خاتون نے بتایا کہ بھارت نے انہیں اطلاع دی ہے کہ وہ خاصی مقدار میں بسکٹ بھی زمینی راستے کے ذریعے واہگہ سرحد سے بھیج رہے ہیں۔
| | | بھارت واہگہ کے راستے بسکٹ بھی پاکستان بھیج رہا ہے |
بھارت کے اسلام آباد میں ہائی کمیشن کے حکام کا کہنا ہے کہ یہ پہلا موقع نہیں ہے کہ بھارتی امداد پاکستان پہنچی ہے ۔ ان کے مطابق اس سے پہلے سیلاب کے متاثرین کے لیے بھی امداد پاکستان بھیجی گئی تھی۔بھارت نے پاکستان کو ہیلی کاپٹر فراہم کرنے کی بھی پیش کش کی تھی۔ تاہم پاکستان نے شکریے کے ساتھ بھارت کی یہ پیشکش یہ کہتے ہوئے قبول نہیں کی تھی کہ انہیں اس کی فی الحال ضرورت نہیں۔ واضح رہے کہ پاکستان اور بھارت میں گزشتہ سنیچر کو آنے والے شدید زلزلے کی وجہ سے بڑے پیمانے پر تباہی ہوئی ہے۔ پاکستان میں تاحال حکام کے مطابق شہریوں اور فوجیوں سمیت ساڑھے تئیس ہزار افراد ہلاک ہوچکے ہیں جبکہ باون ہزار کے قریب زخمی ہوئے ہیں اور پچیس لاکھ افراد بے گھر ہوئے ہیں۔ بھارت میں پاکستان کی نسبت اطلاعات کے مطابق تباہی کم ہوئی ہے اور ان کے زیرانتظام کشمیر کے علاقے میں بتیس ہزار افراد کے بے گھر ہونے کا خدشہ ظاہر کیا جارہا ہے۔ | 
یہ صفحہ دوست کو ای میل کیجیئے
پرِنٹ کریں
