ہارون رشید
بی بی سی اردو ڈاٹ کام، پشاور |  |
| | | جنوبی وزیرستان میں صورتحال قدرے پرامن ہے |
پاکستان کے قبائلی علاقے شمالی وزیرستان میں حکام کا کہنا ہے کہ بدھ کی رات گئے نامعلوم افراد کی جانب سے فوجی ٹھکانے پر داغے گئے راکٹ سے تین افراد ہلاک ہوگئے۔ یہ راکٹ اپنے ہدف کی بجائے ایک قریبی مکان پر گر گیا تھا۔ یہ واقعہ شمالی وزیرستان کے صدر مقام میران شاہ کے علاقے دتہ خیل میں پیش آیا۔ ہلاک ہونے والوں میں محمد جانان، اس کا بیٹا اور بیٹی ہلاک ہوگئے۔ اس حملے میں کسی فوجی نقصان کی اطلاع نہیں ملی ہے۔ حملے کے بعد سیکیورٹی فورسز نے تقریباً آدھ گھنٹے تک جوابی فائرنگ کی۔ مقامی انتظامیہ نے ہزارخیل قبیلے کو مشتبہ افراد حوالے کرنے کے لیے نوٹس جاری کیا ہے۔ جنوبی وزیرستان میں صورتحال کے قدرے پرامن ہونے کے بعد سے اس سال شمالی وزیرستان میں وقفے وقفے سے سیکورٹی فورسز اور مشتبہ عسکریت پسندوں کے درمیان تصادم ہوتا رہتا ہے۔ گزشتہ ہفتے اسی طرح کی لڑائی میں حکام کے مطابق چالیس افراد ہلاک ہوچکے ہیں جن میں سے آدھے غیرملکی بتائے جاتے ہیں۔ | 
یہ صفحہ دوست کو ای میل کیجیئے
پرِنٹ کریں
