عدنان عادل
بی بی سی اردو ڈاٹ کام، لاہور |  |
| | | حزبِ اختلاف نے احتجاجی مظاہرے کی کال دی ہے |
حزب اختلاف کی تین بڑی جماعتوں کے اتحاد نے الزام لگایا ہے کہ حکومت چھ اکتوبر کو ٹاؤن ناظموں کے لیے ہونے والے انتخابات میں لاہور میں اپنے امیدواروں کو بلا مقابلہ منتخب کرانا چاہتی ہے اور حزب اختلاف کے حامیوں اور کارکنوں کو پولیس کے ذریعے ناجائز مقدموں میں گرفتار کررہی ہے اور ان پر دباؤ ڈال رہی ہے۔ حزب اختلاف کی ان تینوں جماعتوں نے ہفتہ کے روز (آج) سہ پہر کو اس معاملہ پر احتجاجی مظاہرہ کی کال دی ہے۔ لاہور میں پیپلزپارٹی، مسلم لیگ(نواز) اور جماعت اسلامی کے رہنماؤں، عزیزالرحمن چن، نصیر بھٹہ، سعد رفیق اور اعجاز چودھری، نے ایک مشترکہ پریس کانفرنس میں بتایا کہ نشتر ٹاؤن میں ناظم کے لیے حزب اختلاف کے امیدوار اور اس کے متبادل امیدواروں کے کاغذات نامزدگی ریٹرننگ افسر نے مسترد کردیے ہیں۔ یوں اب شہر کے اس ٹاؤن میں صرف حکومتی امیدوار شیخ یونس میدان میں ہیں۔ ان رہنماؤں نے الزام لگایا کہ حزب اختلاف کے امیدوار ڈاکٹر زاہد اکرم نت کے تجویز کنندہ اور تائید کنندہ کو پولیس نے اغوا کیا اور ایک بیان پر زبردستی دستخط کرائے کہ انہوں نے اس امیدوار کو تجویز نہیں کیا۔ بعد میں ان لوگوں نے ریٹرننگ افسر ایڈیشنل سیشن جج اعظم علی کے دفتر میں یہ بیان بھی دے دیا جس پر حزب اختلاف کے امیدوار کے کاغذات نامزدگی مسترد کردیے گئے۔ حزب اختلاف کے رہنماؤں نے الزام لگایا کہ ان کے متبادل امیدواروں کے تجویز کنندہ اور تائید کنندہ افراد کو پولیس نے اغوا کرکے غائب کردیا ہے اور کچھ لوگوں کو ناجائز مقدموں میں نامزد کردیا ہے جس کی وجہ سے وہ چھپتے پھر رہے ہیں۔ انہوں نے کہا کہ آج ریٹرننگ افسر نے متبادل امیدواروں کے تجویز کنندہ اور تائید کنندہ لوگوں کے بارے میں پوچھا تو وہ پیش نہیں ہوسکے جس بنیاد پر انہوں نے ان کے کاغذات مسترد کردیے۔ مشترکہ حزب اختلاف نے دعوی کیا کہ پولیس نے ان کے امیدواروں کی انتخابی مہم چلانے والے پندرہ کارکنوں اورمقامی رہنماؤں کو گرفتار کیا ہوا ہے۔ حزب اختلاف نے اپنے مقامی رہنماؤں کی رہائی اور ریٹرننگ افسر کو تبدیل کرنے کا مطالبہ کیا اور چیف الیکشن کمشنر عبدالحمید ڈوگر سے از خود اس صورتحال کا نوٹس لینے کی درخواست کی۔ | 
یہ صفحہ دوست کو ای میل کیجیئے
پرِنٹ کریں
