ہارون رشید بی بی سی اردو ڈاٹ کام، پشاور

	پشاور ہائی کورٹ کا بڑا بینچ شو آف ہینڈ کے ذریعے انتخاب ڈالنے کے معاملے پر غور کرے گا۔

پشاور ہائی کورٹ نے اس معاملے پر تفصیلی غور کے لئے چیف جسٹس کو بڑا بنچ تشکیل دینے کی درخواست کی ہے۔

حکم امتناعی پشاور ہائی کورٹ کے جسٹس محمد رضا خان پر مشتمل سنگل بنچ نے ضلعی نائب نظامت کی امیدوار صالبہ خورشید کی درخواست پر آج جاری کیا۔ درخواست گزار رکن سرحد اسمبلی غالبہ خورشید کی بہن بھی ہیں۔

سیکرٹری الیکشن کمیشن کنور دلشاد نے بی بی سی سے بات کرتے ہوئے کہا کہ پشاور ہائی کورٹ کے حکم کے بعد صوبہ سرحد میں اب اس مرحلے کا انتخاب نہیں ہوگا۔ لیکن باقی تینوں صوبوں میں شیڈول کے مطابق انتخاب ہوگا

درخواست گزار کے وکیل عبدالعزیر قریشی نے عدالت کو بتایا کہ سرحد لوکل باڈیز آرڈینیس میں جو حالیہ ترمیم کی گئی ہے جس کے تحت نائب ناظمین کا انتخاب شو آف ہینڈز کے ذریعہ ہونا ہے جوکہ غیرقانونی، امتیازی اور غیرجمہوری ہے۔

انہوں نے عدالت سے شو آف ہینڈ کے ذریعے منتخب کرنے کے طریقہ کار کو کالعدم قرار دینے کا مطالبہ کیا۔ ان کا کہنا تھا کہ اس طریقہ کار کی موجودگی میں صاف اور شفاف انتخابات منعقد کرانا ممکن نہیں ہوگا۔

عدالت نے درخواست گزار کے دلائل سنے کے بعد مسئلہ پر تفصیلی غور کے لیے چیف جسٹس کو بڑا بنچ تشکیل دینے کے لیے کہا ہے تاہم اس دوران ان انتخابات کے انعقاد کو کل دو پہر ایک بجے تک روکنے کا حکم بھی جاری کیا ہے۔

عدالت بڑے بنچ کی تشکیل کی صورت میں اس معاملے پر بدھ کی صبح غور کرے گی۔ تاہم عدالتوں میں موسم سرما کی چھٹیوں کے باعث یہ شاید مشکل ہو۔ ایسی صورت میں یہ انتخابات بنچ کی تشکیل تک منعقد نہیں ہوسکیں گے۔

عبدالعزیز قریشی نے بی بی سی کو بتایا کہ انہوں نے سرحد لوکل باڈیز آرڈینینس کو چیلنج کیا ہے لہذا یہ حکم امتناعی تمام صوبے پر لاگو ہوگا۔