ریاض سہیل بی بی سی اردو ڈاٹ کام، کراچی

آٹھ ماہ میں پیٹرول کی قیمت میں مجموعی طور پر سات روپے اضافہ ہوا ہے

اس سلسلے میں کراچی میں تین ستمبر کو ٹرانسپورٹر اتحاد کا اجلاس طلب کیا گیا ہے۔ جس میں احتجاج کی حکمت عملی طے جائیگی۔

ٹرانسپورٹرز اتحاد کے سربراہ ارشاد بخاری نے بی بی سی آن لائن سے بات کرتے ہوئے بتایا کہ حکومت نے تیل کی قیمتوں میں مسلسل اضافہ کرکے ہمیں احتجاج پر مجبور کردیا ہے۔

انہوں نے بتایا کہ کرائے میں اضافے کی کوئی تجویز زیر غور نہیں ہے کیونکہ پہلے بھی جو کرایہ بڑھایا ہے لوگ وہ بھی نہیں دے پارہے ہیں۔ اگر کرایہ چھ روپے ہے تو پانچ روپے ملتے ہیں اگر پانچ روپے ہیں چار روپے ملتے ہیں اس پر بھی لڑائی جھگڑے ہوئے ہیں۔

انہوں نے بتایا کہ صرف کراچی میں اٹھارہ ہزار بسیں اور منی بس، پچیس ہزار ٹیکسی کار اور پینتیس ہزار کے قریب رکشہ چلتے ہیں جو احتجاج میں ہمارے ساتھ ہونگے۔

ارشاد بخاری کا کہنا تھا کہ ہڑتال انتہائی قدم ہوتا ہے اور ہماری ہڑتال پرامن ہی ہوتی ہے۔ اس لئے پہلے دیگر اقدمات اٹھائے جائینگے۔

واضح رہے کراچی میں پبلک ٹرانسپورٹروں کے احتجاج کے بعد سندھ حکومت نے فی کلومیٹر کرائے میں ایک روپے کا اضافہ کیا تھا۔