ندیم سعید بی بی سی اردو ڈاٹ کام، ملتان

حادثہ ٹرینوں کے درمیان گھوٹکی کے قریب سرحد سٹیشن پر ہوا تھا۔

سکھر میں ایک پریس کانفرنس سے خطاب کرتے ہوئے ریلوے پولیس کے ڈی آئی جی محمد اقبال خان نے کہا تحقیق کے بعد یہ بات سامنے آئی ہے کہ سرحد ریلوے سٹیشن پر ٹرینوں کے درمیان ہونے والے ہولناک تصادم کی ذمہ داری اے ایس ایم اختیار حسین پر عائد ہوتی ہے۔

ان کا کہنا تھا کہ اختیار حسین حادثے کے وقت قائم مقام سٹیشن ماسٹر کے فرائض سر انجام دے رہے تھے اور سکھر ٹریفک کنٹرول روم میں بیٹھے ڈپٹی کنٹرولر نیاز احمد نے انہیں بروقت اطلاع کردی تھی کہ کراچی ایکسپریس آرہی ہے اور کوئٹہ ایکسپریس کے خراب ہو کر مین لائن پر کھڑے ہونے کے سبب اسے (کراچی ایکسپریس) لوپ لائن پر لیا جائے لیکن ایسا نہیں کیا گیا۔

ان کا کہنا تھا کہ اگر سگنل بدلنے کا خودکار نظام کام نہیں کررہا تھا تو کراچی ایکسپریس کو لوپ لائن پر لینے کے لیئے عام طریقے سے بھی کانٹا بدلا جا سکتا تھا۔ لیکن ایسا اس لئے نہیں کیا جاسکا کیونکہ کانٹا بدلنے پر مامور اہلکار منیر حسین کو اے ایس ایم نے کوئٹہ ایکسپریس کی خرابی دور کرنے والے تکنیکی عملے کی معاونت میں لگایا ہوا تھا۔

ڈی آئی جی کا کہنا تھا کہ عین وقت پر کانٹا بدلنے والے ایک اہلکار کو مینوئل طریقے سے کانٹا بدلنے کا کہا گیا لیکن اس وقت دیر ہو چکی تھی۔انہوں نے کہا کہ کراچی ایکسپریس کے ڈرائیور کی کوئی غلطی نہیں اسے جس لائن پر لیا گیا وہ اسی پر آیا۔

انہوں نے اس بات کی بھی سختی سے تردید کی کہ کراچی ایکسپریس کے انجن سے ڈرائیور اور فائر مین کے علاوہ تیسرے شخص کی لاش بھی ملی تھی۔ انہوں نے کہا کہ حادثہ کسی تخریب کاری کا نہیں بلکے انسانی غلطی کا نتیجہ تھا۔

یاد رہے کہ ریلوے کے وفاقی وزیر میاں شمیم حیدر نے سرحد ریلوے سٹیشن پر ہونے والے حادثے کے حوالے سے اپنے ایک بیان میں اس شبے کا بھی اظہار کیا تھا کہ اس واقعے کے پیچھے تخریب کاری کا عنصر بھی شامل ہوسکتا ہے کیونکہ کراچی ایکسپریس کے انجن سے ایک نامعلوم شخص کی لاش بھی ملی ہے۔

سرحد ریلوے سٹیشن پر ہونے والے حادثے کا مقدمہ ریلوے کے روہڑی پولیس سٹیشن میں نامعلوم افراد کے خلاف فوجداری قانون کے مختلف دفعات کے تحت درج کیا گیا تھا جن میں سرکاری کام سے غفلت اور قتل کرنے کی دفعات بھی شامل ہیں۔