عزیزاللہ خان بی بی سی اردو ڈاٹ کام کوئٹہ

مسافر گاڑی یہاں سے کوئی اڑھائی سو کلومیٹر دور کلی مردان زئی سے لورالائی جا رہی تھی کے اچانک راستے میں بچھائی گئی ایک بارودی سرنگ سے ٹکرا گئی۔ جہاں یہ واقعہ پیش آیا ہے وہاں قریب واقع دکی کے ہسپتال میں موجود ڈاکٹر نصراللہ غلزئی نے بتایا ہے کہ تین خواتین اور ایک نوجوان موقع پر ہلاک ہو گئے تھے جبکہ تین زخمی بچوں سمیت پانچ افراد کو لورالائی ہسپتال لے گئے ہیں۔

لورالائی سے صحافی امانت حسین نے بتایا ہے کہ یہ علاقہ مری اور لونی قبائل پر مشتمل ہے جہاں بارودی سرنگوں سے دھماکے ہوتے رہتے ہیں۔لیکن یہ معلوم نہیں ہے کہ یہ بارودی سرنگیں کس نے بچھائی ہیں۔

یہ علاقہ کوئلے اور دیگر معدنیات سے مالا مال ہے۔ دو سال پہلے اسی علاقے میں ایک گاڑی بارودی سرنگ سے ٹکرا گئی تھی جس میں کئی افراد ہلاک اور زخمی ہو گئے تھے اسی طرح اس علاقے میں نا معلوم افراد نے کوئلے کی کان میں کام کرنے والے مزدوروں پر بھی فائرنگ کی تھی جس میں آٹھ افراد ہلاک ہوگئے تھے۔