ریاض سہیل کراچی

ہنگاموں کے دوران ایک درجن دکانوں کو بھی نقصان پہنچایا گیا

مسجد پر خود کش حملے کے دوران دو حملہ آور اور ایک پولیس اہلکار موقع پر ہی مارے گئےتھے۔ جبکہ دو نمازی ہلاک اور بائیس افراد زخمی ہوگئے۔

شیعہ مسجد پر خودکش حملے کے رد عمل میں ہونے والے ہنگاموں میں جو رات گئے تک جاری رہے امریکی ریسٹورنٹ کے ایف سی کو آگ لگا دی گئی۔ اس ہوٹل کی عمارت سے بعد میں چھ افراد کی لاشیں ملیں۔

گلشن اقبال کےعلاقے میں نیپا چورنگی کے پاس مسجد مدرسۃ العلم پر خودکش حملے کے فورا بعد لوگوں کی بڑی تعداد جمع ہو گئی تھی۔

واقعے کے بعد کیپیٹل سٹی پولیس چیف طارق جمیل اورڈی آئی جی آپریشن مشتاق شاہ نے معائنے کے لئے مسجد تک جانے کی کوشش کی تھی لیکن مشتعل ہجوم نے انہیں شدید نعرے باری، پتھراؤ اور مزاحمت کرکے روک دیا اور وہ واپس چلے گئے۔

مشتعل ہجوم نے کے ایف سی کے علاوہ تین پیٹرول پمپ اور ایک درجن سے زائد گاڑیوں کو ندر آتش کردیا گیا۔ایک درجن دکانوں کو بھی نقصان پہنچایا گیا۔
ایدھی سینٹر کے مطابق کے ایف سی پر حملے میں مرنے والوں کی شناخت ہوگئی ہے۔ ان کے نام محمد سلیم، غلام حسین، نواز، الیاس، آصف اور جونی بتائے گئے ہیں۔ ان میں چار ریسٹورنٹ کے ملازمین ہیں۔

رات کو دیر سے علاقے میں رینجرز کو بھی طلب کرلیا گیا تھا اور شہر میں جاری کشیدگی کے باعث منگل کے روز انٹر کا ہونے والا پرچہ ملتوی کر دیا گیا۔

کراچی میں منگل کے روز اب بھی صورتحال کشیدہ ہے۔ سڑکوں پر ٹریفک اور لوگوں کی آمدرفت کم ہے۔ اخبارات کے اسٹالوں پر لوگوں کا رش ہے جو تازہ ترین صورتحال اور واقعات کی تفصیلات معلوم کرنا چاہتے ہیں ۔

تاہم پولیس کا کہنا ہے کہ اب صورتحال معمول پر آگئی ہے۔ گلشن اقبال کے ایس ایچ او جمشید نے بتایا کہ علاقے میں اب حالات معمول پر ہیں۔