مبشر زیدی بی بی سی اردو ڈاٹ کام، اسلام آباد

سپییکر نے جرنیلوں اور ججوں کو تنقید سے بالا تر قرار دیا تھا

انہوں نے اسلام آباد میں ایک پریس کانفرنس سے خطاب کرتے ہوئے کہا کہ صدر جنرل پرویز مشرف اور فوج کی طرف سے سیاست اور حکمران مسلم لیگ کے معاملات میں ملوث ہونا غیر آئینی ہے اور اپوزیشن اس غیر آئینی اقدام کے خلاف آواز اٹھاتی رہے گی۔

قومی اسمبلی کے سپیکر نے منگل کو حزب اختلاف کی جماعت پیپلز پارٹی کی رکن ناہید خان کے اس تقریر کو حذف کرنے کا حکم دیا تھا جس میں انہوں نے فوج کے خلاف بات کی تھی۔

تاہم مسلم لیگ نواز کے رہنما کا کہنا تھا کہ پاکستان میں غیر قانونی اور غیر آئینی اقدامات کرنے والے صدر جنرل پرویز مشرف کے خلاف تو کوئی کارروائی نہیں کی جاتی مگر جو ان کے غیر قانونی اور غیر آئینی اقدام پر تنقید کرتا ہے اس کو غیر آئینی قرار دیا جاتا ہے۔

چوہدری نثار نے کہا کہ اگر صدر جنرل مشرف اور فوج کی طرف سے سیاست میں ملوث ہونے کا مسئلہ غیر آئینی ہے تو حزب اختلاف یہ کام کرتی رہے گی۔

انہوں نے کہا کہ فوج بحیثیت ادارہ سیاست میں ملوث نہیں ہے مگرصدر جنرل پرویز مشرف سمیت چند مخصوص لوگ فوج کو سیاست میں ملوث کر رہے ہیں۔ انہوں نے کہا کہ اگر فوج سیاست میں ملوث ہو گی تو اس بات کو یقینی بنایا جائے گا کہ اس کے ہاتھ بھی گندے ہوں۔

پی پی پی کی رکن اسمبلی ناہید خان کا کہنا تھا کہ انہوں نےصرف یہ کہاتھا کہ ان چند جرنیلوں کو روکا جائے جو فوج کو سیاست میں ملوث کر رہے ہیں۔ انہوں نے کہا کہ حزب اختلاف کے ارکان نا اہلی سے ڈرنے والے نہیں ہیں۔

چوہدری نثار نے لاہور میں انسانی حقوق کے تحفظ کی غیر سرکاری تنظیم ہیومن رائٹس کمیشن کے جلوس پر پولیس کے تشدد کی مذمت کرتے ہوئے کہا کہ حکومت نے مخلوط میراتھن کا شوشہ خود چھوڑا تھا اور اس کے بعد جب غیر سرکاری تنظیموں نے ایسی میراتھن منعقد کرنے کی کوشش کی تو اس کو پولیس کے زور پر رکوایا گیا اور کمیشن کی صدر عاصمہ جہانگیر سمیت کمیشن کی خواتین ارکان کے کپڑے پھاڑے گئے اور ان کو گرفتار کیا گیا۔