نازش بھٹی نے خودسوزی کی دھمکی واپس لے لی ہے

ملکی پارلیمانی کمیٹی نے اس ضمن میں بلوچستان کے سابق انسپکٹر جنرل ( آئی جی پولیس) شعیب سڈل کو سترہ برس کی نازش بھٹی کے ساتھ ہونے والی مبینہ زیادتی کی چھان بین کرنے کے لیے نامزد کیا گیا ہے۔

نازش بھٹی نے الزام عائد کیا ہے کہ انہیں مردوں کے ایک گروہ نے اجتماعی زیادتی کا نشانہ بنایا اور جب وہ رپورٹ درج کرانے گئیں تو دو پولیس اہلکاروں نے بھی ان کے ساتھ جنسی زیادتی کی۔

نازش بھٹی کو جب یہ یقین دہانی کرائی گئی کہ انہیں انصاف فراہم کیا جائے گا تو انہوں نے خود سوزی کی دھمکی واپس لے لی۔

پاکستانی خواتین میں ایسے واقعات کے خلاف آواز اٹھانے کا رجحان بڑھ رہا ہے

وزارت داخلہ کی قائمہ کمیٹی نے نازش بھٹی کے بیان کے بعد ہی شعیب سڈل کو معاملے کی چھان بین کا نگران مقرر کیا ہے۔

کالج میں فرسٹ ایئر کی طالبہ نازش بھٹی نے واقعہ کی تفصیلات بتاتے ہوئے کہا کہ انہیں گزشتہ ماہ سیالکوٹ سے اغواء کیے جانے کے بعد کئی روز تک یرغمال رکھا گیا۔

ان کا کہنا ہے کہ اغواء کنندگان انہیں تین ہفتے تک متواتر اجتماعی زیادتی کا نشانہ بناتے رہے۔

انہوں نے بتایا کہ جب وہ فرار ہونے بعد رپورٹ درج کرانے تھانے پہنچیں تو دیوٹی پر موجود دو پولیس اہلکاروں نے بھی انہیں ہوس کا نشانہ بنایا۔

پارلیمانی کمیٹی نے شعیب سڈل کی رپورٹ پر سخت کارروائی کرنے کی یقین دہانی کرائی ہے۔ توقع ہے کہ یہ رپورٹ آئندہ ماہ پیش کر دی جائے گی۔