اعجاز مہر بی بی سی اردو ڈاٹ کام، اسلام آباد

چودھری شجاعت کے مطابق مسلم لیگ کے حلقوں میں پیپلز پارٹی سے ڈیل کا تاثر ہے

مسلم لیگ سیکریٹریٹ میں پیر کی شام سیرت النبی کے بارے میں منعقد کانفرنس سے خطاب کرتے ہوئے انہوں نے واضح کیا کہ پیپلز پارٹی سے ’ڈیل‘ نہیں ہوگی اور اب انہیں ڈھیل بھی نہیں دیں گے۔

انہوں نے بتایا کہ مسلم لیگ کے حلقوں میں پیپلز پارٹی سے ڈیل کا تاثر ہے لیکن وہ واضح کرتے ہیں کہ حکومت پیپلز پارٹی سے ڈیل نہیں کرے گی اور انتخابات اپنے موجودہ اتحادیوں کے ساتھ مل کر لڑے گی۔

چودھری شجاعت حسین نے اس موقع پر موجود وفاقی وزیر برائے اطلاعات و نشریات شیخ رشید احمد کو مخاطب ہوکر کہا کہ وہ اب ’کیسٹ چلائیں‘ اور حقائق منظر عام پر لائیں۔

حکمران جماعت کے سربراہ نے اس موقع پر یہ بھی کہا کہ ملکی اور عوامی مفاد میں تھوڑا جھوٹ بولنا چاہیے لیکن سو فیصد ایسا نہیں ہونا چاہیے۔ ساتھ میں انہوں نے کہا سیانے کہتے ہیں کہ بیوی سے کبھی جھوٹ نہیں بولنا چاہیے۔

چودھری شجاعت حسین نے اپنے مخصوص انداز میں کہا کہ یہاں ایسے بھی سیاستدان ہیں جو یہودیوں سے شادیاں کرتے ہیں لیکن ان سے بات کرنے کے مخالف ہیں۔ ان کے بقول ایسے لوگ منافق ہیں اور منافق کو منافق نہ کہنا بھی بڑی منافقت ہے۔

انہوں نے کہا کہ ظلم کہیں بھی ہو عراق میں یا افغانستان میں اس کے خلاف آواز اٹھانی چاہیے لیکن اس کا مطلب یہ ہرگز نہیں کہ خواتین کے خلاف ظلم کے نام پر غیر سرکاری تنظیموں والوں کو سڑکوں پر لایا جائے۔

مسلم لیگی رہنما نے کہا کہ حکمرانوں کے سامنے تعریف نہیں کرنی چاہیے لیکن ان کی تعریف اور جی حضوری کرنا منافقت کے زمرے میں نہیں آتا۔

وزیراطلاعات شیخ رشید احمد نے اس موقع پر پیپلز پارٹی کے بارے میں اپنی جماعت کے سربراہ کی فرمائش پر پیپلز پارٹی کے بارے میں کوئی ’کیسٹ‘ تو نہیں چلائی۔ البتہ کہا کہ اگر کوئی عقل کا اندھا یہ سمجھتا ہے کہ ملک میں دینی قوتیں کمزور ہوگئیں ہیں تو یہ اس کی غلطی فہمی ہوگی۔

انہوں نے کہا کہ اگر مغربی دنیا سنت رسول یعنی داڑھی کی توہیں کرے گی تو ان کے خلاف اسلامی دنیا میں نفرت بڑھے گی۔ اس موقع پر وزیر اطلاعات نے کہا کہ مولانا سمیع الحق ایک اعتدال پسند شخص ہیں اور ان کے بارے میں یورپ نے غلط اندازہ لگایا ہے۔

ادھر پیپلز پارٹی کے رہنما مخدوم امین فہیم نے چودھری شجاعت حسین کے بیان پر ردعمل میں کہا ہے کہ انہوں نے ڈیل کی ہے اور نہ حکومت سے ڈھیل لی ہے اور ان کے بقول نہ ہی انہیں اس کی کوئی ضرورت ہے۔

حزب اختلاف کی جماعت کے اس رہنما کے مطابق لاہور ہو یا اسلام آْباد سب پاکستان کے شہر ہیں اور جہاں بھی انہیں ضرورت پڑے گی وہاں جائیں گے۔