ہارون رشید بی بی سی اردو ڈاٹ کام، پشاور

صدر مشرف نے کہا تھا ہو سکتا ہے عبداللہ محسود مارے گئے ہوں

عبداللہ محسود نے اپنے ترجمان محمد یوسف کی تعیناتی کا اعلان بی بی سی اردو سروس سے اپنے گزشتہ انٹرویو میں کیا تھا۔

آج کسی نامعلوم مقام سے بی بی سی سے بات کرتے ہوئے محمد یوسف نے ان افواہوں کی تردید کی کہ عبداللہ کسی فوجی کارروائی میں زخمی ہونے کے بعد ہلاک ہوگئے تھے۔ انہوں نے بتایا کہ وہ زخمی بھی نہیں ہوئے ہیں۔

ان افواہوں کے بارے میں یوسف کا کہنا تھا کہ یہ حکومت یا بقول ان کے شرپسند عناصر کی کارستانی ہوسکتی ہے جو اس سے اپنا کوئی مفاد حاصل کرنا چاہتے ہونگے۔ تاہم انہوں نے واضح کیا کہ کسی کے آنے جانے سے کوئی فرق نہیں پڑتا اور جہاد کا دروازہ کھلا رہے گا۔

محمد یوسف کے مطابق ترجمان کی تقرری کا مقصد عبداللہ کی حفاظت کو یقینی بنانا ہے۔ کسی نامعلوم شخص نے چند صحافیوں کو گزشتہ دنوں ٹیلیفون کرکے عبداللہ محسود کی ہلاکت کی اطلاع دی تھی جس کی تصدیق سرکاری سطح پر بھی اب تک نہیں ہوسکی ہے۔

بی بی سی سے ایک انٹرویو میں صدر پرویز مشرف نے گزشتہ روز عبداللہ محسود کے بارے میں کہا کہ ’ہم یہ تصدیق کرنے کی کوشش کررہے ہیں کہ آیا وہ زندہ ہے یا مردہ کیونکہ ہمیں ایسی اطلاعات ملی ہیں کہ وہ شاید ہلاک ہوگیا ہو۔‘