اعجاز مہر بی بی سی اردو ڈاٹ کام، اسلام آباد

’وزیر اطلاعات کا بیان غیرذمہ دارانہ ہے اور اس سے قومی سلامتی کو خطرہ لاحق ہوسکتا ہے‘

وزیر اطلاعات نے جمعرات کو اپنے بیان میں کہا تھا کہ پاکستان کے جوہری سائنسدان ڈاکٹر عبدالقدیر خان نے ایران کو ذاتی حیثیت میں ’سینٹری فیوج‘ فراہم کیے تھے۔

متحدہ مجلس عمل کے رہنما حافظ حسین احمد نے نکتہ اعتراض پر کہا کہ اگر ڈاکٹر قدیر خان کا نام آئے گا تو اس وقت کے صدر فاروق احمد خان لغاری اور آرمی چیف کا بھی نام آئے گا۔

جماعتِ اسلامی کے امیر قاضی حسین احمد نے کہا کہ وزیر اطلاعات کا بیان غیرذمہ دارانہ ہے اور اس سے قومی سلامتی کو خطرہ لاحق ہوسکتا ہے اور اس بیان نے پورے ملک کو ایک کٹہرے میں کھڑا کردیا ہے۔

پیپلز پارٹی کے رکن اسمبلی اعتزاز احسن نے کہا کہ یہ سنگین معاملہ ہے اس پر ضرور بحث ہونی چاہیے۔ انہوں نے کہا کہ حکومت اسے انکشاف کہہ رہی ہے جبکہ وہ اسے الزام کہتے ہیں۔ انہوں نے خدشہ ظاہر کیا کہ اس بیان سے پاکستان کو مختلف قسم کے خطرات سے دوچار ہونا پڑسکتا ہے۔

انہوں نے کہا کہ کسی نے سوچا ہے کہ اگر وہ ڈاکٹر قدیر کے نقش پا پر چل پڑے تو پھر کس کس پردہ نشین کا نام آئے گا۔

لیاقت بلوچ نے کہا کہ جب بھی کوئی اہم معاملہ آتا ہے تو حکومت پارلیمان کے بجائے باہر بات کرتی ہے اور تمام فیصلے صدارتی محل میں ہوتے ہیں۔ انہوں نے حکومت پر پارلیمان کا احترام نہ کرنے کا الزام لگایا اور کہا کہ ایسے معاملات پر کھل کر ایوان میں بحث ہونی چاہیے۔

سپیکر نے حزب اختلاف کے اراکین سے کہا کہ وہ نکتہ اعتراض کے بجائے قواعد کے مطابق تحریک پیش کریں تو وہ اس پر بحث کرانے کے لیے تیار ہیں۔ انہوں نے یہ کہہ کر حزب اختلاف کے اراکین کو بات کرنے سے روک دیا اور مائیک بند کرادیے۔ جس پر انہوں نے ایوان سے واک آؤٹ کیا۔