اعجاز مہر بی بی سی اردو ڈاٹ کام، اسلام آباد

ڈاکٹر قدیر گزشتہ فروری میں حکومت سے معافی ملنے کے باوجود بھی غیراعلانیہ حراست میں ہیں

جسٹس محمد نواز عباسی اور جسٹس فقیر محمد کھوکھر پر مشتمل بینچ نے بدھ کے روز سماعت شروع کی تو درخواست گزار حسام الحق کے وکیل ایڈووکیٹ چودھری اکرام نے آئینی درخواست واپس لینے کے لیے ایک درخواست دائر کی۔

وکیل نے کہا کہ ان کے مؤکل کو ڈاکٹر عبدالقدیر خان کا پیغام ملا ہے کہ ان کے مفاد میں یہ ہی ہے کہ درخواست واپس لی جائے۔ انہوں نے کہا کہ ڈاکٹر خان نے درخواست واپس لینے کا پیغام اس وقت بھیجا جب نائب امریکی وزیر رچرڈ آرمیٹیج پاکستان میں موجود تھے۔

ڈاکٹر عبدالقدیر خان کے سابق پرنسپل سٹاف افسر اسلام الحق کے بھائی حسام الحق نے سات ماہ قبل سپریم کورٹ میں آئینی درخواست داخل کی تھی۔ جس میں انہوں نے کہا تھا کہ ڈاکٹر قدیر خان کی صحت خراب ہے اور وہ نفسیاتی مریض بن چکے ہیں۔ درخواست کے مطابق ڈاکٹر خان کو علاج معالجے کی سہولت بھی حاصل نہیں۔

اس درخواست میں استدعا کی گئی تھی کہ ڈاکٹر خان کو عدالت میں طلب کیا جائے اور ان کا غیرجانبدار ڈاکٹروں سے معائنہ کرایا جائے۔

بدھ کو عدالت نے سماعت شروع کی تو اٹارنی جنرل مخدوم علی خان نے درخواست کا جواب داخل کیا جس میں بتایا کہ ڈاکٹر خان کی صحت معمول کے مطابق ہے۔ انہوں نے کہا کہ ایک تو براہ راست یہ درخواست سپریم کورٹ میں داخل نہیں کی جاسکتی اور نیز یہ کہ درخواست دہندہ غیرمتعلقہ شخص ہے۔

اٹارنی جنرل کے مطابق درخواست گزار کے وہ دعوے جن میں کہا گیا ہے کہ ڈاکٹر خان نفسیاتی مریض بن گئے ہیں، ان پر دورہ پڑا اور وہ بے ہوش ہوگئے تھے یا کہ امریکی خفیہ ادارے والے ان سے تفتیش کر رہے ہیں وہ تمام دعوے غلط ہیں۔

اٹارنی جنرل کے مطابق سوائے اتوار کے ایک نرس روزانہ ڈاکٹر خان کا بلڈ پریشر چیک کرتی ہے جبکہ دوسری نرس ہر وقت سٹینڈ بائی رہتی ہے اور وہ ہی ڈاکٹر ان کا علاج کر رہے ہیں جو ان کی حراست سے قبل کرتے تھے۔ تاہم انہوں نے تسلیم کیا کہ ڈاکٹر خان ہائی بلڈ پریشر کے مریض ہیں۔

اٹارنی جنرل کی پیشکش پر عدالت نے رجسٹرار کو ڈاکٹر خان کی صحت کے بارے میں تصدیق کے لیے بھیجا اور سماعت کچھ دیر معطل رکھی۔ رجسٹرار ڈاکٹر خان کے پاس گئے اور واپس آکر عدالت کو بتایا کہ ڈاکٹر خان نے انہیں بتایا ہے کہ ان کا علاج ٹھیک ہورہا ہے اور یہ درخواست ان کی مرضی کے بغیر دائر ہوئی ہے۔

عدالت نے اٹارنی جنرل سے دریافت کیا کہ کیا ڈاکٹر خان کے خاندان کے افراد کو عیدالفطر پر ان سے ملاقات کی اجازت ہوگی؟

اٹارنی جنرل نے کہا کہ اس ضمن میں انہیں حکومت سے کوئی ہدایات موصول نہیں ہوئیں ۔ان کے اس جواب اور رجسٹرار کی رپورٹ کے بعد درخواست گزار کی جانب سے آئینی درخواست واپس لیے جانے کی بنا پر آئینی درخواست عدالت نے خارج کرنے حکم سنایا۔

واضح رہے کہ ڈاکٹر عبدالقدیر خان کو جوہری پھیلاؤ کے مبینہ غیر قانونی کاروبار میں ملوث ہونے کے الزامات کے تحت وزیراعظم کے مشیر کے عہدے سے رواں سال کی ابتدا میں برطرف کرکے کئی ساتھیوں سمیت حراست میں لیا گیا تھا۔

بعد میں ڈاکٹر خان نے صدر جنرل پرویز مشرف سے ملاقات کی اور معافی کی درخواست بھی کی جو صدر نے قبول کرلی تھی۔

ڈاکٹر خان نے سرکاری ٹی وی چینل پر اپنے خطاب میں جوہری کاروبار میں ملوث ہونے کا اعتراف بھی کیا تھا۔ ان کے بیشتر زیر حراست ساتھی رہا ہوچکے ہیں ماسوائے ڈاکٹر محمد فاروق کے، جو اب بھی نظربند ہیں۔

گزشتہ فروری سے ڈاکٹر خان معافی ملنے کے باوجود بھی حکومت کی غیراعلانیہ حراست میں ہیں۔ حال ہی میں ان کے قریبی ساتھیوں نے دعویٰ کیا تھا کہ ڈاکٹر خان کی صحت انتہائی خراب ہے اور قوم کو کسی وقت بھی بری خبر مل سکتی ہے۔