مبشر زیدی بی بی سی اردو ڈاٹ کام،اسلام آباد

اے آر ڈی کے سربراہ مخدوم امین فہیم نے اسلام آباد میں اتحاد کے اجلاس کے بعد ایک پریس کانفرنس میں کہا کہ بلوچستان کا مسئلہ بہت اہم اور حساس ہے اور اپوزیشن رہنما بلوچوں کے ساتھ یکجہتی کے اظہار کے لئے ڈیرہ بگٹی جائیں گے۔

اجلاس میں ایک قرارداد بھی منظور کی گئ جس میں کہا گیا ہے کہ اے آر ڈی بلوچستان میں جاری آپریشن اور غیر ضروری فوجی چھاؤنیوں کے قیام کی مذمت کرتا ہے۔ اپوزیشن نے الزام لگایا کہ حکمران ہر مسئلہ گولی اور لاٹھی کے ذریعے حل کرنا چاہتے ہیں۔

اے آر ڈی نے متحدہ مجلس عمل کی طرف سے اے آر ڈی کے ساتھ مشترکہ تحریک چلانے کے اعلان کا خیر مقدم تو کیا مگر ساتھ ہی کہا کہ سیاسی جماعتوں کے دینی اتحاد کے ساتھ چلنے میں کچھ تحفظات ہیں۔ انہوں نے کہا کہ سترھویں ترمیم پر ایم ایم اے نے اکیلے ہی اڑنے کی کوشش کی جس کے بعد ان کے ساتھ کسی بھی تحریک چلانے سے پہلے کچھ یقین دہانیاں طلب کی جائیں گی۔
اجلاس نےدو سابق وزراء اعظم بینظیر بھٹو اور نواز شریف کی گزشتہ دنوں سعودی عرب میں ہونے والی ملاقات کو تاریخی قرار دیتے ہوئے کہا کہ یہ پاکستان کی سیاسی تاریخ کا اہم سنگ میل ہے۔

مخدوم امین فہیم نے کہا کہ اے آر ڈی اسی سال نئے انتخابات کرانے کا مطالبہ بھی کرتا ہے کیونکہ موجودہ پارلیمنٹ ایک شخص یعنی صدر جنرل پرویز مشرف کو قانونی حیثیت اور تمام اختیارات دینے کے لئے استعمال ہو رہی ہے۔