اعجاز مہر
بی بی سی اردو ڈاٹ کام، اسلام آباد |  |
|  یہ شادی مئی سن دوہزار تین میں امریکہ میں ہوئی تھی |
مسلم لیگی رہنما اسحاق ڈار نے جمعہ کے روز ایک اخباری کانفرنس میں شہباز شریف کی تہمینہ درانی سے شادی کی تصدیق کی ہے اور بتایا ہے کہ یہ شادی مئی سن دوہزار تین میں امریکہ میں ہوئی تھی۔ کچھ دن قبل شہباز شریف کی تہمینہ درانی سے دبئی میں شادی ہونے کی خبر شائع ہوئی تھی جسے انہوں نے غلط قرار دیا۔ اسحاق ڈار نے بتایا کہ شہباز شریف نے اپنے بڑے بھائی میاں نوازشریف سے بھی شادی شرم کے مارے چھپائے رکھی اور پارٹی کے کئی مرکزی رہنماؤں کو بھی پتہ نہیں تھا لیکن ان کے مطابق جب اخبارات کے ذریعے نواز شریف کو اس کا علم ہوا تو شہباز شریف نے بھی اپنے بڑے بھائی کے سامنے اقرار کرلیا۔ انہوں نے ایک سوال پر تھوڑا غصہ کرتے ہوئے کہا کہ جو لوگ ’حرام کاری‘ کرتے ہیں انہیں کوئی نہیں پوچھتا اور شہباز شریف نے اسلامی طریقے سے نکاح کیا ہے اور اس پر اعتراضات نہیں کرنے چاہیے۔ تہمینہ درانی پہلی بار ستر کی دہائی میں خبروں میں آئیں جب وہ ’شیر پنجاب‘ غلام مصطفیٰ کھر سے شادی کر کے ان کی آٹھویں بیوی بنی تھیں۔ شہباز شریف اور تہمینہ دونوں کی اپنی زندگی کی تیسری شادی ہے۔ شہباز شریف نے پہلی شادی نصرت شہباز اور دوسری عالیہ ہنی نامی خاتون سے کی۔ نصرت شہباز تو اب بھی ان کے نکاح میں ہیں لیکن عالیہ ہنی سے اطلاعات کے مطابق ان کی علیحدگی ہوچکی ہے۔ تہمینہ درانی نے ’مائی فیوڈل لارڈ‘ نامی کتاب لکھ کر ’شیرِ پنجاب‘ کے ساتھ اپنی ازدواجی زندگی کے کئی راز فاش کیے تھے۔ بعد میں انہوں نے کچھ اور کتابیں بھی لکھیں۔ ان کی کتاب ’مائی فیوڈل لارڈ‘ دنیا کی بیس سے زیادہ زبانوں میں ترجمہ ہوکر شائع کی گئی۔ میاں شہباز شریف ان دنوں امریکہ میں علاج کی غرض سے موجود ہیں اور اسحاق ڈار کے مطابق ان کے مختلف ٹیسٹ ابھی باقی ہیں۔ اسحاق ڈار کی پریس کانفرنس کا بنیادی مقصد تو بلوچستان کے متعلق اقدامات کرنے کے لیے تجاویز پیش کرنا اور کراچی الیکٹرک سٹی کارپوریشن کی حالیہ نجکاری پر اعراضات بیان کرنا تھا لیکن اس شادی کے متعلق ان سے کئی سوالات ہوئے جن کا انہوں نے کھل کر جواب دیا۔
| 
یہ صفحہ دوست کو ای میل کیجیئے
پرِنٹ کریں
