عدنان عادل بی بی سی اردو ڈاٹ کام، لاہور

جج نے جاوید ہاشمی کی پیشی کا حکم جاری کیا تھا

احتساب ریفرنس میں ان پر الزام عائد کیا گیا ہے کہ انہوں نے اپنی معلوم آمدن سے زیادہ اثاثے بنائے۔ اس مقدمہ میں یہ بھی الزام لگایا گیا ہے کہ جاوید ہاشمی کے کچھ اثاثے ان کی بیوی اور بیٹیوں کے نام ہیں جو دراصل بےنامی دار ہیں۔

ریفرنس کی سماعت پر گواہوں پر جرح مکمل ہو گئی تھی تاہم جاوید ہاشمی اُس وقت عدالت میں موجود نہیں تھے۔ وکیل صفائی نے عدالت سے کہا تھا کہ گواہوں پر جرح کے وقت ملزم جاوید ہاشمی کا ہونا ضروری ہے اس لیے انہیں عدالت میں طلب کیا جائے لیکن عدالت نے یہ درخواست مسترد کردی تھی۔

تاہم جرح مکمل ہونے کے بعد استغاثہ نے بھی عدالت سے کہا کہ ملزم کا جرح کے وقت موجود ہونا لازمی ہے جس پر جج نے جاوید ہاشمی کی آج پیشی کا حکم جاری کیا تھا۔

آج جاوید ہاشمی کو لاہور کی احتساب عدالت میں راولپنڈی سے لا کر پیش کیا گیا۔ ان کی غیر حاضری میں گواہوں پر کی گئی جرح کو جج نے منسوخ کر دیا۔ اب یہ منسوخ کی گئی کاروائی دوبارہ ہوگی۔

عدالت نے مقدمہ کی مزید سماعت دس فروری تک ملتوی کر دی ہے ۔جاوید ہاشمی کے پیشی کے موقع پر مسلم لیگ کے کارکنوں کی بڑی تعداد عدالت کے باہر جمع تھی۔