مبشر زیدی بی بی سی اردو ڈاٹ کام ، کراچی

پولیس نے مفرور بیٹے کے بدلے رانجھن کو پکڑ لیا

کندھ کوٹ سے ایک سال قبل آنے والے رانجھن اپنے بیٹے مداری سے ملنے کراچی آئے تھے۔ مگر ان کا بیٹا کسی بات پر اپنے دوست سے جھگڑ پڑا اور اپنے ہی گھر میں قتل کر کے بھاگ گیا۔ جس کے بعد پولیس نے موقع سے رانجھن کو اس لئے گرفتار کر لیا کہ انہیں حراست میں رکھنے سے ان کا بیٹا پولیس کو گرفتاری دے دے گا۔

مگر رانجھن کا بیٹا بدستور مفرور رہا جس کے بعد پولیس نے رانجھن کو ہی گرفتار کر کے ان پر قتل میں مدد دینے کا الزام لگا کر جیل بھجوا دیا۔

تقریباً چھ مہینے کی حراست کے بعد انسانی حقوق کی مقامی تنظیم انصار برنی ویلفیئر ٹرسٹ نے ان کی ضمانت کے لئے مچلکہ جمع کرایا اور ان کی رہائی عمل میں آئی۔

انصار برنی ٹرسٹ کے دفتر میں ہفتے کو بی بی سی سے بات کرتے ہوئے انہوں نے کہا کہ ان کو لگتا تھا کہ ان کی بقیہ زندگی جیل میں ہی گزرے گی اور وہ وہیں مر جائیں گے۔

ٹرسٹ کے ڈائریکٹر صارم برنی کا کہنا ہے کہ یہ بات قابل افسوس ہے کہ جرم کسی نے کیا ہو اور اس کی سزا کوئی اور کاٹے۔ انہوں نے حکام سے مطالبہ کیا کہ اس غیر قانونی حراست کے ذمہ دار افراد کے خلاف فوری کارروائی ہونی چاہیے۔

کراچی میں پولیس کی طرف سے لوگوں کو غیر قانونی حراست میں رکھنے کے واقعات بڑھتے جا رہے ہیں۔

منگل کو سندھ ہائی کورٹ کے چیف جسٹس سعید اشہد نے بن قاسم کے ٹاؤن پولیس آفیسر اور ایس ایچ او اسٹیل ٹاؤن کو ایک شخص محمد اختر کی آئینی درخواست پر نوٹس جاری کیا ہے جس میں کہا گیا ہے کہ گلشنِ حدید کے آٹھویں جماعت کے طالبعلم محمد صدیق کو پولیس اس کے مطلوب بھائی محمد اسحاق کے بدلے میں اٹھا کر لے گئی ہےاور گھر والوں سے کہا ہے کے جب اسحاق گرفتاری دے گا تو صدیق کو چھوڑ دیا جائے گا۔