 |  وزیر اعظم شوکت عزیز نے پشاور میں جرگے سے خطاب کیا |
پاکستان کے وزیراعظم شوکت عزیز نے آج پشاور میں ایک قبائلی جرگے سے خطاب میں جنوبی وزیرستان کے احمدزئی وزیر قبائل پر سے اقتصادی پابندیاں غیرمشروط طور پر اٹھانے کا اعلان کیا ہے۔ یہ پابندیاں اس سال اٹھائیس مئی کو اس قبیلے پر حکومت کے ساتھ القاعدہ کے غیرملکی عناصر کے خلاف کارروائی میں مدد نہ کرنے پر نافذ کی گئی تھیں۔ وزیر اعظم شوکت عزیز نے پابندیاں اٹھانے کا اعلان تمام سات قبائلی ایجنسیوں سے آئے ہوئے تقریبا پانچ سو قبائلی عمائدین کے ایک جرگے میں کیا۔ اس کے علاوہ وزیر اعظم نے قبائلی علاقوں کے لئے ترقیاتی بجٹ میں بھی ایک ارب روپے کے اضافے کا اعلان کیا جس میں سے پچاس کروڑ روپے فوری طور پر جاری کر دیے جائیں گے۔ شوکت عزیز نے، جن کا وزارت عظمی کی ذمہ داریاں سنبھالنے کے بعد پشاور کا یہ پہلا دورہ تھا، اپنے خطاب میں قبائلیوں سے مل کر مذاکرات کے ذریعے غیرملکی عناصر کا قضیہ حل کرنے کی اپیل کی۔ ان کا کہنا تھا کہ مسائل غیرملکیوں کی وجہ سے پیدا ہوئے ہیں جن کی وجہ سے پاکستان اور اسلام کی بدنامی ہوئی ہے۔ وزیر اعظم کے مطابق غیرملکی پاکستان کو نقصان پہنچا رہے ہیں اور انہیں کچل دیا جائے گا۔ یہ اعلان ایک ایسے وقت سامنے آیا ہے جب جنوبی وزیرستان میں مشتبہ عسکریت پسندوں اور سیکورٹی دستوں کے درمیان جھڑپوں کا سلسلہ جاری ہے۔ ان جھڑپوں میں فوجی حکام کا کہنا ہے کہ اب تک ڈیڑھ سو مشتبہ شدت پسند ہلاک کئے جا چکے ہیں۔ وزیر اعظم شوکت عزیز کی جانب سے پابندیاں اٹھانے کے اعلان سے جنوبی وزیرستان میں خوشی اور اطمینان کی ایک لہر دوڑ گئی ہے۔ اس سال اٹھائیس مئی کو احمدزئی وزیر قبائل پر لگائی گئی ان پابندیوں کے تحت وانا کے رستم بازار اور دیگر شہروں میں اُن کے کاروبار، ہزاروں دکانیں اور ٹرانسپورٹ بند کر دی گئی تھیں جبکہ کئی قبائلیوں کو حراست میں لے لیا گیا تھا۔ اس سے اس پسماندہ علاقے کی چھوٹی موٹی معیشت ختم ہو کر رہ گئی تھی۔ اب امید کی جا رہی ہے کہ وانا کے رستم بازار میں ایک مرتبہ پھر چل پہل لوٹ آئے گی۔ البتہ کئی متاثرہ قبائلیوں کا کہنا تھا کہ وہ اس عرصے میں انہیں پہنچنے والے نقصانات کی تلافی کس سے طلب کریں۔ ادھر وانا سے موصول اطلاعات کے مطابق نامعلوم افراد نے کل رات اور آج صبح بھی سکاؤٹس کیمپ کو راکٹوں سے نشانہ بنانے کی کوشش کی، البتہ راکٹ ہدف سے دور گرے۔ جواب میں سیکورٹی فورسز نے بھی کارروائی کی لیکن کسی جانی نقصان کی اطلاع نہیں ہے۔ | 
یہ صفحہ دوست کو ای میل کیجیئے
پرِنٹ کریں
