ہارون رشید بی بی سی اردو آن لائن، پشاور

اسفندیار ولی نے پاکستان کی تمام قوم پرست اور جمہوری قوتوں سے اپیل کی ہے کہ وہ متحد ہو کر حکومت کو بقول ان کے خطرناک راستے پر چلنے سے روکیں

اے این پی کے مرکزی صدر اسفندیار ولی نے آج پشاور میں ایک اخباری کانفرنس میں ملک کی تمام قوم پرست اور جمہوری قوتوں سے اپیل کی ہے کہ وہ متحد ہو کر حکومت کو بقول ان کے خطرناک راستے پر چلنے سے روکیں۔ ’آج حکومت جو کچھ کر رہی ہے اس سے ملک میں انتشار پیدا ہوگا۔‘

جماعت کے دیگر اہم مرکزی اور صوبائی رہنماؤں کی موجودگی میں سینٹر اسفندیار نے کہا وفاق صرف آئین کی کتابوں تک محدود ہوکر رہ گیا ہے۔ ان کا کہنا تھا کہ مضبوط مرکز اور مضبوط پاکستان میں تضاد ہے۔

انہوں نے دیگر جمہوری قوتوں سے اپیل کی کہ انہیں مل کر وفاق کو نقصان پہنچانے والوں کا مقابلہ کرنا چاہیے۔ ’ہر جماعت کا اپنا پروگرام ہوگا لیکن ہم سب کو اب ایک ’منیمم کامن پروگرام‘ یعنی کم از کم مشترکہ پروگرام پر اکٹھا ہونا چاہیے۔

ان کا کہنا تھا کہ وہ بلوچستان میں بنائی جانے والی فوجی چھاؤنی کے بارے میں وہ صرف اتنا کہیں گے کہ اس کے خلاف قومی اسمبلی میں پاس کی گئی قراد دادوں کی پاسداری کی جائے۔

عوامی نیشنل پارٹی نے اس موقعہ پر بلوچ سیاستدانوں کے خلاف قائم کیے گئے مقدمات واپس لینے اور فوج کی بیرکوں میں واپسی کا مطالبہ کیا۔

عوامی نیشنل پارٹی نے کچھ عرصہ قبل قوم پرست جماعتوں کے اتحاد پونم سے علیحدگی اختیار کر لی تھی جو کہ مبصرین کے خیال میں اسے موجودہ حالات میں آواز اٹھانے کا ایک اچھا موقعہ فراہم کر سکتی تھی۔ لیکن بلوچ سیاستدانوں پر آنے والےاس کڑے وقت میں اے این پی بھی اس کے ساتھ کھڑی نظر آتی ہے۔