حسین عسکری بی بی سی اردو ڈاٹ کام، کراچی

کراچی میں ڈاکٹر بھائیوں کی رہائی کے لیے مظاہرہ

سوموار کو استغاثہ کی جانب سے دونوں ڈاکٹروں کے نام کور کمانڈر کراچی پر حملے اور رینجرز اہلکاروں پر حملے کے مقدمات میں پیش کیے جانے والے چالانوں میں شامل نہیں کیے گئے۔

تاہم ان کے خلاف القاعدہ کے لوگوں کا علاج کرنے کا مقدمہ چلایا جائے گا۔ ڈاکٹر اکمل اور ڈاکٹر ارشد پر الزام ہے کہ انہوں نے القاعدہ سے تعلق رکھنے والے افراد کا علاج کیا اور یہ جانتے ہوئے کہ وہ افراد حکومت کو مطلوب ہیں اس بات کو حکومت سے چھپایا۔

کور کمانڈر کراچی پر دس جون کو ہونے والے حملے میں گیارہ افراد ہلاک ہو گئے تھے جن میں سات فوجی، تین پولیس اہلکار اور ایک راہگیر شامل تھا۔ جبکہ انیس مارچ کو شارع فیصل پر رینجرز اہلکاروں پر کیے گئے حملے میں دو اہلکار ہلاک ہو گئے تھے۔

عدالت میں جنداللہ نامی تنظیم سے مبینہ تعلق رکھنے والے سولہ ملزمان کے خلاف آٹھ مقدمات کے چالان بھی پیش کیے گئے جن میں کور کمانڈر کراچی پر حملہ، رینجرز اہلکاروں پر حملہ، چار اپریل کو گلستان جوھر کے علاقے میں پولیس تھانے پر حملہ اور دیگر مقدمات شامل ہیں۔ پولیس تھانے پر حملے میں پانچ اہلکار ہلاک ہو گئے تھے۔

ان سولہ ملزمان میں سے نو گرفتار اور سات مفرور ہیں۔ گرفتار ہونے والوں میں جنداللہ کا مبینہ سربراہ عطاالرحمن بھی شامل ہے۔