عدنان عادل بی بی سی اردو ڈاٹ کام، لاہور

فوج کی کاروباری سرگرمیوں سے حاصل کی گئی رقم وفاقی محصول میں جمع نہیں کرائی جاتی بلکہ براہ راست فوج استعمال کرتی ہے

یہ بات وفاقی وزارت دفاع نے قومی اسمبلی میں پوچھے گئے ایک سوال کے جواب میں جمعرات کے روز بتائی۔ سوال میں پوچھا گیا تھا کہ فوج کو دی گئی اے ون قسم کی زمینوں (جو فوجی تربیت وغیرہ کے لیے دی جاتی ہیں) پر کیا کاروباری سرگرمیاں کی جارہی ہیں۔

دفاعی امور کے لیے پارلیمانی امور کے سیکٹری میجر (ریٹائرڈ) تنویر حسین نے قومی اسمبلی کو ’اے ون‘ زمینوں پر فوج کی کاروباری سرگرمیوں کی تفصیل بتاتے ہوۓ کہا کہ پنجاب میں فوج کے ان زمینوں پر بائیس پٹرول پمپ ، تینتیس جنرل اسٹور، گیارہ بیکریاں، سات برف کےکارخانے، تین سینما گھر اور زرعی زمینیں ہیں جن سے دس کروڑ روپے سے زیادہ سالانہ آمدن ہوتی ہے۔

صوبہ سرحد میں افواج پاکستان کو دس پٹرول پمپوں، تیرہ جنرل اسٹوروں، چار بیکریوں اور چار سینما گھروں سے تقریبا ایک کروڑ نوے لاکھ روپے کی سالانہ آمدن ہے۔

سندھ میں چار پٹرول پمپوں، ایک بیکری، تین برف کے کارخانوں، چار جنرل اسٹوروں اور زرعی زمینوں کے آّٹھ رقبوں سے ایک کروڑ چوبیس لاکھ روپے سالانہ آمدن ہوتی ہے۔

بلوچستان میں افواج پاکستان کو دو پٹرول پمپوں ، دو جنرل اسٹوروں اور زرعی زمین کے ایک رقبہ سے تیرہ کروڑ چھتیس لاکھ روپے سالانہ آمدن ہوتی ہے۔

جواب میں کہا گیا کہ ان کاروباری سرگرمیوں سے حاصل کی گئی رقم وفاقی محصول میں جمع نہیں کرائی جاتی بلکہ براہ راست فوج استعمال کرتی ہے اور انھیں فوج کے سالانہ دفاعی اخراجات میں شامل نہیں کیا جاتا۔

جواب میں یہ بھی بتایا گیا کہ فوج کے ادارہ میں چیک اینڈ بیلنس کا ایک نظام ہے جس میں ان تمام رقوم کو آڈٹ کیا جاتا ہے۔

یہ سوال متحدہ مجلس عمل کے رکن فرید احمد پراچہ نے پوچھا تھا۔ تاہم حزب اختلاف نے سوال کے نامکمل جواب دیے جانے پر ایک ٹوکن واک آؤٹ کیا۔