سونیا کے بچے پاکستان سے بڑے متاثر ہیں

ذرائع کے مطابق صدر مشرف نے سونیا گاندھی کو انتخابات جیتنے پر مبارکباد دی اور انہیں امن کی خاطر پاکستان کے عزم کا یقین دلایا۔

بھارت کی وزارتِ خارجہ کے ترجمان نوتیج سرنا کے مطابق پاکستان کے صدر نے سونیا گاندھی سے کہا کہ وہ مذاکرات کے عمل کی حمایت کریں۔

پاکستان کے وزیرِ اطلاعات اور حکومت کے ترجمان شیخ رشید احمد نے بی بی سی کو بتایا کہ صدر پاکستان نے بات چیت کے دوران سونیا گاندھی سے کہا دونوں ملکوں کا مستقبل امن کے ساتھ وابسطہ ہے اور انہیں امن کے قیام کو آگے لے کر چلنا ہے۔ سونیا گاندھی نے صدر کو یقین دلایا کہ وہ امن مذاکرات جاری رکھیں گی اور دونوں ملک امن اور شانتی سے ہی اپنے مسائل حل کریں گے۔

ترجمان کے مطابق سونیا گاندھی نے صدرِ پاکستان سے کہا کہ ان کے بچوں کو پاکستان کے دورے کے دوران بہت پذیرائی ملی اور وہ اس سے بہت متاثر ہیں۔

انہوں نے کہا کہ وہ وقت ملنے پر پاکستان ضرور آئیں گی۔

ترجمان نے کہا کہ سونیا کب آئیں گی یہ کہنا ابھی قبل از وقت ہو گا۔