جنرل راحیل شریف کابل پہنچ گئے

پاکستان کی فوج کے سربراہ جنرل راحیل شریف افغان صدر اشرف غنی اور دیگر سیاسی و عسکری قیادت کے ساتھ ملاقات کے لیے کابل پہنچ گئے ہیں۔

جنرل راحیل شریف اور افغان قیادت کے درمیان ملاقاتوں میں افغانستان میں تعطل کا شکار امن مذاکراتی عمل کی بحالی کے حوالے بھی بات چیت کی جائے گی۔

<link type="page"><caption> ’افغانستان میں امن، مصالحت کے لیے سازگار ماحول کی ضرورت‘</caption><url href="http://www.bbc.com/urdu/world/2015/11/151117_raheel_brennan_meet_langley_mb.shtml" platform="highweb"/></link>

آئی ایس پی آر کے مطابق جنرل راحیل شریف افغانستان کی اعلیٰ سیاسی و عسکری قیادت سے ملاقاتوں میں سرحدوں کے انتظامی امور اور افغانستان میں امن کی بحالی کے حوالے سے بات چیت کریں گے۔

اس سے قبل امریکی خبررساں ادارے ایسو سی ایٹڈ پریس کے مطابق جنرل راحیل شریف کو اس ماہ کے شروع میں اسلام آباد میں افغانستان کے بارے میں ہونے والی بین الاقوامی کانفرس کے انعقاد سے قبل نو دسمبر کو کابل جانا تھا لیکن دونوں ملکوں کے درمیان تعلقات کی پیچیدگی کے باعث یہ دورہ ملتوی کر دیا گیا تھا۔

خیال رہے کہ افغان حکومت اور طالبان کے درمیان براہ راست مذاکرات پہلی مرتبہ اس سال جولائی میں پاکستان کی میزبانی میں اسلام آباد کے قریب سیاحتی مرکز مری میں منعقد ہوئے تھے۔

لیکن مذاکرات کا یہ سلسلہ طالبان کے رہنما ملا محمد عمر کی پاکستان کے ایک ہسپتال میں طبی موت واقع ہونے کی خبر سے تعطل کا شکار ہو گیا تھا۔

اسلام آباد میں اس ماہ کے شروع میں منعقد ہونے والے ’ہارٹ آف ایشیا‘ کانفرنس میں افغانستان کے صدر اشرف غنی نے شرکت کی تھی۔ ان کے علاوہ اس کانفرنس میں بھارت کی وزیر خارجہ سمشا سوراج ، امریکہ اور چین کے نمائندوں بھی موجود تھے۔