بلوچستان میں پرتشدد واقعات میں تین اہلکار ہلاک
،تصویر کا ذریعہAFP
- مصنف, محمد کاظم
- عہدہ, بی بی سی اردو ڈاٹ کام، کوئٹہ
پاکستان کے صوبہ بلوچستان میں تشدد کے دو مختلف واقعات میں تین پولیس اہلکار ہلاک ہوگئے ہیں۔
اہلکاروں کی ہلاکت کے واقعات کوئٹہ اور افغانستان سے متصل سرحدی شہر چمن میں پیش آئے۔
ان میں سے دو پولیس اہلکاروں کو چمن میں نشانہ بنایا گیا۔
چمن میں انتظامیہ کے ذرائع کے مطابق مقامی پولیس کے دو اہلکار بوغرہ روڈ پر معمول کی گشت پر تھے جہاں نامعلوم مسلح افراد نے ان پر حملہ کیا جس سے دونوں پولیس اہلکار ہلاک ہوگئے۔
اس حملے میں ایک راہگیر زخمی بھی ہوا۔
تیسرے پولیس اہلکار کی ہلاکت کا واقعہ کوئٹہ شہر میں سریاب کے علاقے میں پیش آیا۔
نیوسریاب پولیس سٹیشن کے ایک اہلکار نے بتایا کہ ہلاک ہونے والا اہلکار بلوچستان کانسٹیبلری کا ہیڈ کانسٹیبل تھا۔
پولیس اہلکار نے بتایا کہ نامعلوم مسلح افراد نے بلوچستان کانسٹیبلری کے ہیڈ کانسٹیبل کو غلام رسول مینگل روڈ پر نشانہ بنایا۔
End of سب سے زیادہ پڑھی جانے والی
چمن اور کوئٹہ میں پولیس اہلکاروں کو ہلاک کرنے کا محرک معلوم نہیں ہوسکا اور نہ ہی تاحال کسی نے ان واقعات کی ذمہ داری قبول کی ہے۔
بلوچستان میں حالات کی خرابی کے بعد سے پولیس اہلکار بھی ٹارگٹ کلنگ کا نشانہ بنتے رہے ہیں۔
پولیس کے ذرائع کے مطابق بلوچستان میں سنہ 2006 سے اب تک 500 سے زائد پولیس اہلکار ہلاک ہوئے ہیں۔
