’امریکہ کسی پارٹی کی حمایت نہیں کرتا‘

امریکہ نے کہا ہے کہ وہ پاکستان میں گیارہ مئی کو بر وقت، شفاف، آزادانہ اور منصفانہ عام انتخابات کی امید رکھتا ہے اور یہ کہ وہ کسی مخصوص سیاسی جماعت یا امیدوار کا حامی نہیں ہے۔

یہ بات امریکی دفتر خارجہ کے ترجمان نے کہی ہے۔

ترجمان پیٹرک وینٹرل نے امریکی دارالحکومت واشنگٹن ڈی سی میں میڈیا بریفنگ کے دوران ایک سوال کے جواب میں کہا:

’ہم کسی مخصوص سیاسی جماعت یا امیدوار کی حمایت نہیں کرتے اور ہم یہ بات پہلے بھی کہتے رہے ہیں، اور یہ کہ ہم آنے والی جمہوری طور پر منتخب حکومت کے ساتھ بات چیت کا ارادہ رکھتے ہیں۔‘

امریکی ترجمان نے کہا کہ یہ انتخابات اقتدار کی جمہوری طور پر منتقلی کی اہم علامت اور ایک تاریخی پیش رفت ہے جس پر پاکستان کے عوام بجاطور پر فخر کرسکتے ہیں۔

امریکی دفترِ خارجہ کے ترجمان نے پاکستان میں انتخابات سے قبل ہونے والے پرتشدد واقعات کی بھی مذمت کی۔

انھوں نے کہا، ’ امریکہ پاکستان میں حالیہ تشدد کی مذمت کرتا ہے جس میں سیاست دانوں اور ان کے حامیوں کو انتخابی مہم کے دوران نشانہ بنایا گیا ہے۔ اسی طرح ہم شدت پسند تنظیموں کے حالیہ بیانات کی بھی مذمت کرتے ہیں جن میں انھوں نے پاکستان میں جمہوری سیاسی عمل میں خلل ڈالنے کا ارادہ ظاہر کیا ہے۔‘

ترجمان نے کہا کہ ہم پاکستانی عوام کے اپنے نمائندوں کے انتخاب میں بھرپور طور پر حصہ لینے کے حق کی حمایت کرتے ہیں اور ایک پرامن، خوشحال اور جمہوری قوم کی خواہش کی تکمیل کی صلاحیت کے بھی حامی ہیں۔

ایک اور سوال کے جواب میں امریکی ترجمان نے کہا کہ امریکہ اپنے یورپی اتحادیوں کے ساتھ مل کر پاکستان میں عام انتخابات کی نگرانی کے عمل میں شامل ہونے کا ارادہ رکھتا ہے اور یہ کہ وہ منصفانہ اور شفاف انتخابی عمل میں مدد کے لیے پاکستان کی وزارت خارجہ کے ساتھ مل کر کام کررہا ہے۔