’سیاست کریں لیکن جنازے نہ اٹھائیں‘

پاکستان پیپلز پارٹی پارلیمنٹرینز کے چیئرمین مخدوم امین فہیم نے اشارہ دیا ہے کہ ان کی جماعت روایتی انداز میں انتخابی مہم نہیں چلائی گی کیونکہ وہ اپنے کارکنوں اور عوام کو خطرے سے دوچار نہیں کرنا چاہتے۔

کراچی میں جمعرات کو ایک پریس کانفرنس سے خطاب کرتے ہوئے مخدوم امین فہیم کا کہنا تھا کہ ایک زمانہ تھا جب انتخابی مہم میں ہر دروازے پر جاتے تھے تب دہشت گردی، ڈر اور خوف نہیں ہوتا تھا۔

’بینظیر بھٹو بھی انتخابی مہم کے لیے پورے پاکستان میں نکلی اور آخر ان کی ہلاکت ہوگئی، ہم چاہتے ہیں کہ ہم سیاست کریں لیکن جنازے نہ اٹھائیں اور لوگوں کا تحفظ ہو‘۔

انتخابات ملتوی ہونے کے کسی بھی امکان کو انہوں نے مسترد کیا اور کہا کہ جن ممالک میں جنگیں ہوتی ہیں وہاں بھی الیکشن ہوتے ہیں، امن و امان کی صورتحال کو بہانہ بنا کر الیکشن ملتوی نہیں کیے جا سکتے۔

نگراں حکومت کی مدت میں اضافہ سے متعلق ایک سوال کے جواب میں انہوں نے مرزا غالب کا شعر پڑھ کر سنایا کہ ’ہزاروں خواہشیں ایسی کہ ہر خواہش پر دم نکلے‘، ان کے مطابق نگراں حکومت کا کام محض الیکشن کرانے تک ہے۔

کراچی سے نامہ نگار کے مطابق پاکستان پیپلز پارٹی کے چیئرمین بلاول بھٹو زرداری سے متعلق ایک سوال پر مخدوم امین فہیم نے کہا کہ وہ کچھ روز قبل دوبئی گئے تھے تاہم اب وہ کہاں ہیں، اس سے لاعلم ہیں لیکن وہ سیاسی میدان میں موجود ہیں۔ بلاول کا حالیہ ویڈیو پیغام کہاں سے جاری ہو وہ یہ نہیں جانتے۔

مخدوم امین فہیم نے واضح کیا کہ پیپلز پارٹی میں فیصلے اتفاق رائے سے ہوتے ہیں، جب ان سے پوچھا گیا کہ انتخابی مہم میں ان کی تصویر استعمال کیوں نہیں کی جاتی تو ان کا کہنا تھا کہ انہیں تصویر چھپوانے کا کوئی شوق نہیں ہے۔

انہوں نے اس امید کا اظہار کیا کہ آئندہ حکومت سازی میں پیپلز پارٹی کا بڑا کردار ہوگا اور سندھ سے ان کی جماعت اکثریت سے کامیاب ہوگی۔