مبشر زیدی بی بی سی اردو ڈاٹ کام، اسلام آباد

	ابھی تک یہ معلوم نہیں کہ بش سینیئر کب پاکستان کا دورہ کریں گے

اس تقرری کی اطلاع اقوام متحدہ کے سیکریٹری جنرل کوفی عنان نے پاکستان کے صدر جنرل پرویز مشرف کو گزشتہ شب ٹیلیفون پر دی تھی۔ اس تقرری کی منظوری اقوام متحدہ کی جنرل اسمبلی نے دی تھی۔

تاہم ابھی یہ نہیں بتایا گیا ہے کہ بش سینیئرکب پاکستان کا دورہ کریں گے۔

پاکستان کی سرکاری خبر رساں ایجنسی اے پی پی کے مطابق کوفی عنان نے پاکستانی صدر سے زلزلہ زدہ علاقوں میں بحالی اور تعمیر نو اور امدادی آپریشن کے بارے میں تبادلہ خیال بھی کیا۔

پاکستان میں زلزلے سے متاثرہ علاقوں میں امدادی آپریشن کے نگران اور اقوام متحدہ کے ریزیڈنٹ کوآرڈینیٹر جان وینڈر مورٹیل نے دو روز قبل پاکستان کے زلزلہ زدہ علاقوں کے لیے بین الاقوامی برادری سے اضافی عطیات کی اپیل کی تھی اور کہا تھا کہ متاثرہ علاقوں میں پانچ ہزار فٹ سے نچلے علاقوں میں چوبیس لاکھ کمبلوں، خیموں کے لیے ایک لاکھ ستر ہزار پلاسٹک کی شیٹ اور خیموں کے فرش پر بچھانے کے لیے دو لاکھ ترپالوں کی ضرورت ہے جس پر پینتالیس ملین ڈالرکا خرچہ آئے گا ۔

اقوام متحدہ کے اہلکار کے مطابق دسمبر میں زلزلے سے متاثرہ علاقوں کے لیے دیے گئے عطیات کی فراہمی میں کمی آ رہی ہے۔

اقوام متحدہ کے اہلکار نے ناروے، برظانیہ، امریکہ، جرمنی، سویڈن کی طرف سے دیے گئے عطیات کا خیر مقدم کرتے ہوئے کہا تھا کہ جن ممالک نے ابھی تک زلزلے سے متاثرہ علاقوں کے لیے عطیات نہیں دیے ہیں وہ فوری دے دیں۔